Google Microsoft устидан Европа комиссиясига шикоят қилди

ASTANA. Kazinform - Google компанияси Microsoft корпорациясига нисбатан Европа комиссиясига монополияга қарши шикоят аризаси билан мурожаат қилиб, уни Windows дастурий таъминотидан мижозларни ўзининг Azure булутли платформасига боғлашда, шунингдек уларни муқобил вариантларга осон ўтиш имкониятидан маҳрум қилишда айблади, деб хабар беради Kazinform агентлиги Anadolu Ajansıга таяниб.

Google маълумотларига кўра, Microsoft мижозларни Azureдан фойдаланишга мажбурлаш ва уларни ўз экотизимига боғлаш учун бозор кучи ва чекланган лицензиялаш шартларидан фойдаланмоқда.

Microsoft адолатли рақобатга йўл қўйиш ўрнига, бошқа булутли провайдерларни танлаган мижозларни жазолаш учун Windows сервер бизнесидаги таъсиридан фойдаланмоқда.

Қайд этилишича, Microsoft қисқа вақт ичида булутли ҳисоблаш саноатида сезиларли ўсишга эришган. Google ушбу сектордаги таҳлилчиларнинг умидларини қондира олмади.

Қолаверса, бу Google томонидан Европа комиссиясига юборилган биринчи шикоят бўлгани эътиборга молик.

Илгари Google Европа Иттифоқида рақамли реклама учун монополияга қарши жаримани бекор қилиш бўйича ишда ғолиб чиққан эди.

Эслатиб ўтамиз, АҚШ ҳукумати Googleни реклама бозорида монополист сифатида тан олишни талаб қилган эди.