Гондурасдаги аёллар қамоқхонасидаги тартибсизликларда 41 киши ҳалок бўлди
Қарама-қарши тўдалар ўртасида муштлашув бошланди, шундан сўнг бир тўда иккинчисининг камерасига ўт қўйди. Расмийларнинг айтишича, ёнғин ўлимга сабаб бўлган, бироқ қурбонларнинг баъзилари отиб ўлдирилган.
Хавфсизлик вазири ўринбосари Хулисса Вильянуэва фавқулодда ҳолат эълон қилди.
«Инсонларнинг қурбон бўлишига йўл қўйиб бўлмайди», - деди у.
Қамоқхона Гондурас пойтахти Тегусигальпадан 20 км узоқликда жойлашган бўлиб, 900 га яқин маҳбусга мўлжалланган. Яна бир неча маҳбус касалхонага ётқизилган.
Маҳбусларнинг оила аъзолари вакили Дельма Ордонеснинг маҳаллий матбуотга айтишича, воқеа натижасида қамоқхонанинг бир қисми бутунлай вайрон бўлган.
Президент Ксиомара Кастро ижтимоий тармоқларда аёлларнинг ўлдирилишидан даҳшатда эканлигини ва қатъий чоралар кўришини айтди.
Гондурас коррупция ва тўда зўравонликлари билан машҳур. Қўшни мамлакатлар Сальвадор ва Гватемала билан бир қаторда мамлакат Жанубий Америкадан АҚШга кокаиннинг асосий транзит йўли ҳисобланади.
