Германиянинг Киль шаҳри коммунал хизматчилар иш ташлашидан сўнг ахлат остида қолди

BERLIN. Kazinform - Шлезвиг-Гольштейн пойтахти Киль шаҳрида ўтган чоршанба кунидан бери шаҳар чиқиндиларини йиғиш хизмати иш ташлашга киришди. Натижада шаҳар кўчалари аллақачон чиқиндига тўлиб кетган, дея хабар беради Кazinform агентлиги мухбири.

Маҳаллий Bild нашри йирик шаҳарнинг ифлосланиши ҳақида ёзади.

Агар ушбу ҳафтанинг жума кунигача шаҳар ахлат ташувчи машиналар йўналишларга чиқмаса, бу ахлатни олиб ташлашда тўққиз кунлик танаффусни англатади.

“Ахлат қутиларига тушиб, ахлатни ташламоқчи бўлган одамнинг устига сакраб тушиши мумкин бўлган каламушлар айниқса қўрқинчли”, - дея шикоят қилади маҳаллий фуқаро Андре Германия нашрига берган интервьюсида.

Айрим аҳоли чиқиндиларини ўзлари қайта ишлаш шохобчаларига олиб борадилар, у ерда 300 метргача навбат ҳосил бўлган. Бундан ташқари, вазият чўзилиши мумкин: жума кунидан кейин ҳафта охири бўлади, унда олиб ташлаш ҳам амалга оширилмайди.

Манфаатлар тўқнашуви бутун Германия бўйлаб уй-жой ва коммунал соҳа ходимларининг давом этаётган иш ташлаши билан боғлиқ. Verdi касаба уюшмаси иш ҳақини 8 фоизга оширишни талаб қилмоқда, лекин камида 350 евро. Иш ташлашлар нафақат чиқиндиларни йиғиш, балки болалар боғчалари, шифохоналар ва ҳатто аэропортларга ҳам таъсир кўрсатди.

Эслатиб ўтамиз, аввалроқ Германияда жамоат транспорти ходимлари оммавий иш ташлаш ўтказмоқчи экани ҳақида хабар берган эдик.

Муаллиф: Арнур Раҳимбеков