Германия полицияси давлат тўнтаришига уринишда гумон қилинган 25 кишини ҳибсга олди
Адлия вазири Марко Бушман ушбу ташкилот Германия Федератив Республикасининг қонунийлигини тан олмайдиган «Рейхсбургер» мафкурасининг бир қисми эканлигини маълум қилди, деб хабар беради Kazinform Deutche Wеlleга таяниб.
Чоршанба куни эрталаб ўтказилган тинтув чоғида ушбу террор ташкилоти аъзоси ва тарафдорлари эканлиги аниқланган 25 нафар гумондор қўлга олинди.
Бушманнинг айтишича, тергов Рейхсбюргер ҳаракати билан алоқадорликда гумон қилинган террор ташкилотига қарши қаратилган.
Унга кўра, қидирув Германия давлат муассасаларига қуролли ҳужумни режалаштирганликда гумон қилинган шахсларга нисбатан ўтказилган.
«Бугун эрталабдан бошлаб йирик аксилтеррор операцияси давом этмоқда. Федерал Бош прокурор террорчиликда гумон қилинган ташкилотни тергов қилмоқда. Конституциявий органларга қуролли ҳужум режалаштирилган деган шубҳа бор», — деб ёзган Бушман.
Қидирув операцияси Германиянинг ўн бир федерал ҳудудидаги 52 гумондорга тегишли 130 та мулкни қамраб олган.
Прокуратура маълумотларига кўра, қўлга олинган гумонланувчилар «2021 йил ноябр ойи охиригача ташкил этилган террорчилик ташкилотига тегишли. У Германиянинг мавжуд давлат тартибини ағдариб, унинг ўрнига улар яратган давлат шаклини қўйишни мақсад қилган.
«Рейхсбюргер» ҳаракати Бранденбург, Мекленбург-Померания ва Бавариядаги бир қанча кичик ташкилотлар ва шахслардан иборат. Улар Германия Федератив Республикаси ёки унинг давлат органларининг қонунийлигини тан олмайдилар.
Сурат: Pol Zinken/dpа
Муаллиф: Еркежан Смағулова
