Германия компанияси Қозоғистонда қиймати 500 млн долларлик лойиҳаларни амалга оширади
ASTANA. Kazinform — Давлат раҳбари Linde GmbH компаниясининг катта вице-президенти Оливер Пфаннни қабул қилди, деб хабар беради Ақорда.
Қасим-Жомарт Тоқаев Linde компаниясининг мамлакат саноатини ривожлантиришга қўшаётган ҳиссасини юқори баҳолади.
Linde — ишлаб чиқариш учун зарур газлар ва муҳандислик соҳасидаги дунёдаги етакчи компаниялардан бири. Компания технологиялари металлургия, тоғ-кон саноати, кимё, энергетика, соғлиқни сақлаш, электроника соҳаларида ҳамда юқори технологияли ишлаб чиқариш корхоналарида кенг қўлланилади.
Президент компаниянинг Қозоғистонда инвестиция қиймати 500 миллион долларгача баҳоланадиган бир қатор лойиҳаларни амалга ошириш режасини қўллаб-қувватлади. Шу жумладан, Linde ва Qarmet компаниялари ўртасида Темиртау шаҳрида янги ҳавони ажратиш қурилмасини қуриш бўйича келишув имзоланганини ижобий баҳолади.
Учрашув давомида нефть-кимё саноатидаги қўшма лойиҳаларнинг истиқболлари муҳокама қилинди.
Давлат раҳбари углеродни тутиш ва сақлашга мўлжалланган Linde технологияларига алоҳида тўхталиб, компаниянинг водород инфратузилмасини ривожлантиришга интилиши мамлакатнинг «яшил» иқтисодиёт стандартларига ўтиш вазифасига мос келишини таъкидлади.
Шунингдек, Қасим-Жомарт Тоқаев Атирау ва Манғистау вилоятларида нефть-кимё ва кимё кластерини ривожлантириш ишлари бошланганини қайд этди. У Linde компаниясини истиқболли ушбу лойиҳаларда иштирок этишга чақирди.
Оливер Пфанн компания лойиҳаларини қўллаб-қувватлагани учун Қозоғистон Президентига миннатдорлик билдирди. Шунингдек, ҳамкорлик доирасини янада кенгайтириш ва мамлакатда янги ишлаб чиқариш корхоналарини очишга тайёр эканини маълум қилди.
