Ғазо секторидан деярли барча қозоғистонликлар эвакуация қилинди – ҚР ТИВ раҳбари

Қозоғистон Республикаси Ташқи ишлар вазири Мурат Нуртилеу Каzinform мухбири билан эксклюзив интервьюсида Қозоғистон фуқароларини Ғазо секторидан эвакуация қилиш жараёни қандай амалга оширилгани ҳақида гапирди.

“Ғазо секторида кўплаб қозоғистонликлар истиқомат қилаётганини ҳисобга олиб, Ташқи ишлар вазирлиги Қозоғистон давлат органлари билан биргаликда фуқароларнинг ҳуқуқ ва эркинликларини ҳимоя қилиш манфаатларини кўзлаб, жанговар зонадан эвакуация парвозларини ташкил этди. 127 киши, шу жумладан уларнинг оила аъзолари ватанига қайтарилди”, – деди Мурат Нуртилеу.

Ҳозирда Ғазода бир қозоғистонлик ва унинг Фаластин фуқаролари бўлган 10 нафар оила аъзоси ихтиёрий равишда эвакуация қилишдан бош тортганлар қолмоқда.

“Вазирлик ва хорижий идоралар вазиятни кузатишда давом этмоқда ва агар қозоғистонликлардан ариза тушса, эвакуация қилишга тайёр. Шуни ҳам эслатиб ўтмоқчиманки, Ғазо секторидаги гуманитар вазият ёмонлашгани сабабли Қозоғистон Ғазо аҳолисига бир миллион АҚШ доллари миқдорида инсонпарварлик ёрдами ва 38 тонна гуманитар юк жўнатган. Булар озиқ-овқат маҳсулотлари, чойшаблар, дори-дармон ва тиббиёт буюмлари ва бошқалар”, – деди ҚР ТИВ раҳбари.

М.Нуртилеу ўз ватанига муваффақиятли эвакуация қилиниши ва инсонпарварлик юкларининг етказилиши Қозоғистон Республикасининг жалб этилган давлат органлари ва хорижий институтларининг биргаликдаги фаолияти самараси эканини таъкидлади.

Эслатиб ўтамиз, 17 ноябрь куни Қозоғистон Ҳукуматининг биринчи эвакуация самолёти 99 нафар фуқарони, шу жумладан Қозоғистон Республикасининг 59 нафар фуқароси ва 40 нафар чет эл фуқаросини оилалари билан ўз ватанларига муваффақиятли етказган эди. Иккинчи рейс 11 декабрь куни Мисрдан қайтиб, Астанага 28 киши, жумладан, Қозоғистон Республикасининг 8 фуқароси ва 20 нафар фаластинлик оила аъзоларини олиб келди.