Францияда топилган Олтин Ўрда тарихига оид қўлёзма нусхаси Қозоғистонда нашр этилди
ASTANA. Kazinform - Қўлёзмалар ва нодир китоблар миллий маркази Францияда “Архив 2025” дастури доирасида топилган Қозоғистон тарихига оид қимматли қўлёзма нусхасини нашр этди. Бу ҳақда Kazinform агентлиги хабар беради.
Қозоғистон Республикаси Маданият ва ахборот вазирлиги матбуот хизматининг хабар беришича, Муиниддин Натанзийнинг Париж Миллий кутубхонасида сақланаётган тарихий асари “Танланган йилномалар” Ҳижрий 816/1413 йилда Шерозда ёзилган. Яъни, бу асар ХV асрга оиддир.
Араб алифбоси билан форс тилида ёзилган китоб 15 мавзуга бағишланган бўлиб, 15 бобдан иборат. 413 саҳиадан ташкил топган.
— Жумладан, китобда Оқ Ўрда ҳақида батафсил маълумот берилган ва хонлар ҳукмронлиги даври тўлиқ хронологияси берилган. Шунингдек, Оқ Ўрда ҳукмдорлари, уларнинг оталари ва оналарининг исмлари, шунингдек, дафн этилган жойлар ёзилган қимматбаҳо жадвал тақдим этилган. Асарда Олтин Ўрданинг Кўк ва Оқ Ўрдаларга парчаланиши даври тасвирланган. Шунингдек, Сиғаноқда Оқ Ўрданинг 10 нафар ҳукмдори дафн этилгани маълум қилинган, - дея таъкидлади Маданият ва ахборот вазирлиги.
Муиниддин Натанзий ХIV асрнинг иккинчи ярмида Исфахон (Эрон) яқинида жойлашган Натанз қишлоғида туғилган. Давлатшоҳ Самарқандийнинг “Тазкират уш-шуаро” (“Шоирлар таржимаи ҳоли”) асарида ёзилишича, ХV аср бошларида Муиниддин Натанзий Шерозда Искандар жаноблари (Амир Темирнинг набираси) саройида яшаган, шунингдек, у Ҳайдар Хоразмий, Ҳофиз Хоразмий ва бошқа шоирларнинг замондоши бўлган.
