Франция ва БАА СИ маълумотлар марказини қурмоқчи

ASTANA. Kazinform — Франция ва БАА 30 дан 50 миллиард долларгача бўлган сармояни ўз ичига олувчи 1 гигаваттли маълумотлар марказини қуриш бўйича асосли келишувга эришди, деб хабар беради Kazinform агентлиги мухбири.

Reuters хабарига кўра, пайшанба куни президент Эммануэль Макрон амирлик ҳамкасби шайх Муҳаммад бин Зоид ан-Наҳённи қабул қилди. Учрашув келаси ҳафта Парижда бўлиб ўтадиган сунъий интеллект саммити олдидан бўлиб ўтди. Саммитда 100 га яқин давлат қатнашиши ва сунъий интеллект имкониятларини муҳокама қилиши кутилмоқда.

10-11 февраль кунлари бўлиб ўтадиган саммит, Франция ва Европани сунъий ақл харитасига киритишни мақсад қилган. Чунки улар энергияни кўп талаб қилувчи технологиялар соҳасида етакчи давлатлар АҚШ ва Хитой билан рақобатлашишга ҳаракат қилмоқда.

“Икки давлат раҳбарлари сунъий интеллект соҳасида стратегик ҳамкорликни йўлга қўйиш ниятида эканликларини билдирдилар. Шунингдек, улар СИ қиймат занжирини ривожлантиришни қўллаб-қувватловчи лойиҳалар ва инвестициялар бўйича ҳамкорлик қилиш имкониятларини ўрганиш мажбуриятини олдилар”, - дейилади қўшма баёнотда.

Иккала давлат ҳам Франция ва Амирлик сармоялари сунъий интеллект, илғор чиплар, маълумотлар марказларини сотиб олиш ва истеъдодларни ривожлантиришга йўналтирилишини таъкидлади. Томонлар, шунингдек, сунъий интеллект ва булутли технологиялар учун суверен инфратузилмани яратиш имконини берувчи виртуал маълумотлар элчихоналарини ташкил этиш ниятида эканликларини эълон қилишди.

Биринчи сармоявий эълон шу йил охирида бўлиб ўтадиган Choose France саммитида эълон қилиниши кутилмоқда.