Францияда Германия фуқароси хотинини 12 йил давомида тутқунликда сақлаган

PARIS. Kazinform - Францияда ўз хотинини сўнгги 12 йил давомида тутқунликда сақлаган Германия фуқароси ҳибсга олинди, дея хабар беради Кazinform BBC Newsга таяниб.

Франция полицияси эр-хотиннинг квартираси ётоқхонасида сочи олдирилган аёлни топди. Афтидан, аёл ташқарига чиқмаслиги учун ётоқхонага кириш жойи темир панжара билан ёпилган.

Эр-хотин яшаган уй Германия билан чегара яқинида жойлашган. 53 ёшли аёл қандайдир йўл билан Германия полициясига етиб бора олди, полиция эса ўз навбатида франциялик ҳамкасбларини огоҳлантирди.

Текширув натижасида аёлнинг соғлиғи «ёмон» деб баҳоланган. Хонадонда аёлдан ташқари тўққизга яқин мушук бўлган. Франция полицияси аёлнинг баданида қон ёки зўравонлик излари йўқлигини айтди.

55 ёшли эри одам ўғирлаш ва бошқа жиноятларда гумонланиб ҳибсга олинган. Ҳибсга олинган вақтда эркак ишсиз бўлган. У аввал Германияда саноат соҳасида ишлаган.

Германиянинг Bild газетаси қўшниларидан интервью олди, улар эркак уларга хотини саратон касаллигига чалинганини ва у «касаллик туфайли оғриқдан қичқираётганини» айтди.

Қўшни Алисиянинг AFPга айтишича, аёл ҳеч қачон уйдан чиқмаган. Гарчи у қичқириқларни эшитган ва улар касаллик туфайли деб ўйлаган бўлса-да. У бу одамни «жуда мулойим, ширин» деб таърифлади.

Кўчада яшовчи яна бир гувоҳ Эрика аёлни охирги марта «балки 10 йил олдин» кўрганини ва «эҳтимол у ўлган ёки кўчиб кетгандир» деб ўйлаганини айтди.

Франция ОАВлари хабарларига кўра, полиция квартирадан кундалик дафтарини топиб олган, унда эркак ўз фаолияти, жумладан, хотинини овқатлантиргани қайд этилган деб таъкидланмоқда.