Forbes рўйхатига кирган 17 ёшли қозоғистонлик ошпаз даромад сирини очиб берди

— Ошпазликка қизиқишингиз қандай бошланган? Ким сизга профессионал ошпаз бўлиш учун илҳом берган?

— Мен Алматида туғилиб ўсганман. Учта акам бор, оилада энг кенжасиман. Ошпазликка 11 ёшимда қизиқишни бошлаганман. Менга туркиялик ошпазлар Бурак Ўздемир ва Нусрет Гўкче илҳом берган. Уларнинг ишларини Instagram ижтимоий тармоғида тез-тез кузатиб бораман. «Рататуй» мультфильми ҳам менда ошпазликка бўлган қизиқишни уйғотган.

Биринчи тайёрлаган таомим - оддий қовурилган тухум бўлган. Суратга олган илк видеоролигим эса «Наполеон» торти рецептига бағишланган. Ривожланишимга акам Диас катта ёрдам берган.

— Сиз танлаган касбга нисбатан жамиятдаги қарашлар тўсқинлик қилмадими? Жамиятда ҳали ҳам овқат тайёрлашни аёлларнинг вазифаси деб ҳисоблайдиганлар бор...

— Бу - эскирган тушунча. Овқат пишириш ҳар бир инсон учун зарур кўникма. Мен учун таом тайёрлаш — ижод, бу жараёндан завқ оламан.
Тенгдошларимдан, ҳатто мендан кичик болалар билан ҳам тез-тез хабарларлашиб тураман. Улар менинг рецептларим бўйича таом тайёрлаб кўрганини ёки видеоларимдан кейин блог юритишга қизиқиб қолганини ёзадилар. Бу мени хурсанд қилади.

— Ҳозир ғайриоддий таомлар ва катта ҳажмда овқат тайёрлашга кўпроқ эътибор қаратяпсиз. Контент йўналишини ўзгартиришга нима сабаб бўлди?

— Аудиториям кенгайгани сари бошқа фуд-блогерлардан ажралиб туришни ва ўз услубимни шакллантиришни хоҳладим. Шунинг учун ғайриоддий таомлар тайёрлаб, уларни таъсирчан тарзда тақдим этишга ҳаракат қиламан. Баъзан жуда катта миқдорда овқат тайёрлайман. Бундай видеолар томошабинларга қизиқ.

Шунингдек, ота-онам учун дастурхон ёзишни яхши кўраман. Яқинларимизга ғамхўрлик қилишимиз ва уларни хурсанд этишимиз кераклигини кўрсатмоқчиман. Мен учун оилавий қадриятларни тарғиб қилиш муҳим.

— Ижтимоий тармоқлардаги машҳурликни профессионал ошпазлик билан қандай уйғунлаштиряпсиз? Келажакда бош-ошпаз бўлиш учун қандай қадамлар қўймоқчисиз?

— Бу - менинг катта орзуим. Яқинда Narxoz университетининг «Ресторан иши ва меҳмонхона бизнеси» йўналишига ўқишга кирдим. Ресторан бизнесининг ички тузилишини тушунишни ва ушбу соҳада сифатли таълим олишни хоҳлайман.

Келгуси режам — тажрибали ресторатор билан бирга ишлаб, ундан тажриба орттириш. У жамоани қандай бошқариши, қарорларни қандай қабул қилиши ва қийинчиликларни қандай ҳал этишини кўрмоқчиман. Амалий тажриба тўплаш ўз лойиҳамни очишимга ёрдам беради. Келажакда ўз ресторанимни очишни режалаштиряпман.

— Қозоқ миллий таомларини хорижий аудиторияга таништириш имконияти бўлса, қайси учта таомни танлаган бўлардингиз?

— Биринчи навбатда бешбармоқни тавсия қилардим. Уни катта миқдорда тайёрлаб, гўштни қайнатишдан тортиб, хамир ёйишгача бўлган жараённи кўрсатишни хоҳлайман.

Иккинчи таом — бўғирсоқ. Уни юмшоқ ва қизаргунча пишириб, иссиқ ҳолда уй қаймоғи билан тақдим этардим. Учинчиси — қўй гўштидан тайёрланадиган “сірне” таоми.

— YouTube каналингиз дастлабки уч йилда даромад келтирмаган. Шунга қарамай, фаолиятингизни давом эттиришга нима куч берди?

— 11 ёшимда монетизация ҳақида ўйламаганман. Минглаб одамларнинг менинг рецептларим бўйича таом тайёрлаши ва илиқ фикрлар ёзиши мен учун катта қувонч эди. Бу ишга қизиқиш ва ижод қилиш истаги билан киришганман.

Дастлабки даромад кела бошлагач, блогнинг масъулияти ҳам ортди. Хоббим бизнесга айланганини тушундим. Акам билан топган пулимизни дарҳол лойиҳани ривожлантиришга сарфладик. Квартира сотиб олиб, орзумиздаги ошхонани жиҳозладик, ёритиш ускуналари ва идиш-товоқлар харид қилдик. Сифатли контент тайёрлаш учун озиқ-овқат маҳсулотларига ҳам кўпроқ маблағ ажрата бошладик. Шу тариқа, даромад ғояларимизни амалга ошириш имконини берди.

— Ҳозир каналингизда 4 миллиондан ортиқ обуначи бор, видеоларингиз эса 2,5 миллиард мартадан кўпроқ кўрилган. Қандай видеолар аудиторияни кўпроқ қизиқтиради?

— Томошабинларга шоу элементлари мавжуд бўлган, ғайриоддий таомлар тайёрланадиган видеолар ёқади. Масалан, иликдан таом тайёрлаш, жуда кўп миқдорда манти пишириш ёки хамирдан ейиш мумкин бўлган идиш ясаб, унинг ичига тайёр таом солиб тақдим этиш ҳақидаги видеолар кўп марта томоша қилинган.

Томошабинлар эътиборини таомнинг катта ҳажми ва ғайриоддий тақдим этилиши орқали жалб этаман. Шу билан бирга, янги ошпазлик усулларини ўзлаштиришга ҳаракат қиламан.

— Блог юритишни бошлаш учун биринчи телефонингизга пул йиғиб, трайфл, торт ва капкейклар сотган экансиз. Бу тажриба сизга нимани ўргатди?

— Орзуга эришиш учун меҳнат қилиш кераклигини ўргатди. Видеога олиш учун телефон керак бўлганида, ўз қўлим билан десертлар тайёрлаб сотдим ва биринчи iPhone телефонимни сотиб олиш учун пул йиғдим.

Шундаёқ мақсадга эришиш учун мўъжиза кутиб ўтирмасдан, ҳаракат қилиш кераклигини тушундим. Ҳозир ҳам шу тамойилга амал қиламан.

— Ижтимоий тармоқлар орқали танилиб, даромад топишни истаган ёшларга қандай маслаҳат берган бўлардингиз?

— Биринчидан, қўлингиздаги имкониятлардан бошланг. Қиммат камера ёки қулай фурсатни кутиш шарт эмас.

Иккинчидан, ўзингизга хос жиҳатларни топинг. Фуд-блогерлар кўп, шунинг учун томошабинларни нима билан ҳайратда қолдиришингиз мумкинлиги ҳақида ўйланг.

Учинчидан, меҳнатсевар ва сабрли бўлинг. Таом тайёрлаш жараёнини видеога олиш осон эмас. Шу сабабли натижага эришиш учун мунтазам ишлаш керак.

Муаллиф: Молдир Снадин