Филадельфиядаги отишмада тўрт киши ҳалок бўлди, тўрт киши яраланди

PHILADELPHIA. Kazinform – Филаделфиянинг Кингсессинг туманида душанба куни тунги отишмада тўрт киши ҳалок бўлди, яна тўрт киши яраланди, дея хабар беради Kazinform 6ABC Action Newsга таяниб.

Полиция маълумотларига кўра, ҳалок бўлганлар орасида бир ўсмир ҳам бор.

Отишма 56-кўча ва Честер Авеню яқинида содир бўлган. Воқеа жойига полиция соат 20:30 да етиб келган. Бир неча қурбонлар Penn Presbyterian Hospital, яна бир ўсмир эса Филадельфия болалар касалхонасига ётқизилган.

Полициянинг айтишича, гумондор Фразьер-стрит, 1800-уйда содир бўлган отишмадан кўп ўтмай қўлга олинган. У ўқ ўтказмайдиган жилет кийган, милтиқ ва тўппонча билан қуролланган.

Полиция тергов олиб бораётган бир пайтда Кингсессинг-авеню ва Честер-авеню орасидаги 56-кўча ёпилган.