Фавқулодда вазиятларда жабрланганларга етказилган зарарни қоплаш тамойиллари эълон қилинди

ASTANА. Кazinform - Табиий фавқулодда вазиятларда жабрланганларга етказилган зарарни қоплаш тамойиллари эълон қилинди, дея хабар беради Қозоғистон Республикаси Ҳукумати матбуот хизмати.

Қозоғистон Республикаси Ҳукуматининг 2014 йил 19 декабрдаги 1358-сон қарорига мувофиқ, фавқулодда вазиятларда жабрланганларга етказилган зарарни қоплаш алгоритми қуйидагича:

1. Моддий зарар кўрган жабрланувчилар моддий зарарни қоплаш тўғрисида маҳаллий ижро этувчи ҳокимият органига (маъмурий органга) зарар етказилган кундан эътиборан 30 календарь кун ичида ариза билан мурожаат қиладилар.

Агар жабрланувчининг ариза ёзиш имконияти бўлмаса, унинг қариндошлари ёки ишончнома асосида бошқа шахслар, шунингдек, жабрланувчи вояга етмаган бўлса, унинг қонуний вакиллари етказилган зарарни қоплаш тўғрисида ариза билан мурожаат қилишлари мумкин.

Кўрсатилган зарарни қоплаш тўғрисидаги аризага: жабрланувчининг шахсини тасдиқловчи ҳужжат нусхаси; табиий офат содир бўлган пайтдан бошлаб ёки офатни бартараф этиш даврида жабрланган шахснинг йўқолган ва (ёки) шикастланган мол-мулкининг рўйхати илова қилинади.

2. Ҳокимлик жабрланувчига ҳужжатларни олганлиги тўғрисида тилхат бериб, моддий зарарни қоплаш тўғрисидаги аризаларни ва ҳужжатларни рўйхатдан ўтказади.

3. Моддий зарарни қоплаш тўғрисидаги ариза ҳокимликга ҳужжатлар келиб тушган кундан бошлаб 15 иш куни ичида кўриб чиқилади.

4. Ҳокимлик ариза рўйхатга олинган кундан бошлаб 10 иш куни ичида баҳоловчини жалб қилган ҳолда етказилган зарар миқдорини (ариза берувчининг мулкига кириш имконияти бўлиши керак) баҳолашни ташкил қилади. Жабрланувчи баҳолаш учун вақт ва жойни белгилайди, шундан сўнг жабрланувчи баҳолаш ҳисоботини кўриб чиқиши керак.

5. Ҳокимлик баҳоловчиси хулоса чиқаргандан кейин 3 иш куни ичида вилоят, республика аҳамиятидаги шаҳар, пойтахт, туман ва вилоят аҳамиятидаги шаҳар бюджетларини ижро этиш бўйича ваколатли орган билан келишилган ҳолда маблағлар ажратиш тўғрисида қарор қабул қилади.

6. Жабрланувчиларга тўлов тегишли қарор қабул қилингандан кейин 30 календарь кун ичида амалга оширилади.

Мулкни тўлиқ ва сифатли баҳолаш учун мутахассисларнинг иши сув тошқини билан боғлиқ вазият барқарорлашгандан кейин ва уйлар ва ҳовли майдонларидан сув тўлиқ тортиб олингандан сўнг бошланади.

Маҳаллий ижро ҳокимияти органларига зарур ҳолларда аризаларни қабул қилиш муддатини узайтириш топширилди.