Европанинг тўртта йирик компанияси Starlinkка қарши «майдонда» бирлашди
ASTANA. Kazinform — Европанинг тўртта йирик телекоммуникация оператори мобил алоқа қамровини кенгайтириш ва қитъадаги муҳим алоқа инфратузилмаси устидан назоратни кучайтириш мақсадида сунъий йўлдош алоқаси хизматларини ривожлантиришни режалаштирмоқда. Ушбу ташаббус Илон Маскнинг Starlink тизимига рақобатчи бўлиши мумкин, деб хабар беради Kazinform агентлиги мухбири.
Deutsche Telekom, Orange, Telefónica ва Vodafone компаниялари Mobile Satellite Services (MSS) — сунъий йўлдош алоқаси хизматлари учун мўлжалланган частота спектрини биргаликда олишга ариза бериш имкониятини кўриб чиқиш тўғрисидаги ниятлар баённомасини имзолади. Бу ҳақда компанияларнинг қўшма баёнотида маълум қилинган.
Ташаббус Европадаги мобил алоқа операторларига сунъий йўлдош алоқаси хизматларидан очиқ ва адолатли фойдаланиш имкониятини яратишни назарда тутади. Бу орқали операторлар истеъмолчиларга бевосита қурилмага уланадиган сунъий йўлдош алоқаси — Direct-to-Device (D2D) хизматларини таклиф қилиши мумкин бўлади. Бундай модель рақобатни рағбатлантириш, бозорнинг парчаланишини камайтириш ва истеъмолчилар учун танлов имкониятларини кенгайтиришга қаратилган.
Тўртта компаниянинг таъкидлашича, лойиҳа алоқа хизматлари етарлича қамраб олинмаган ҳудудларда тармоқлардан фойдаланиш имкониятини ошириш, жамоат алоқа тармоқларининг барқарорлигини яхшилаш ва муҳим коммуникацияларни ҳимоя қилишга ёрдам беради. Шунингдек, у Европанинг ўз сунъий йўлдош тизимини ривожлантиришга ҳам ҳисса қўшади.
Таклиф этилаётган келишувга мувофиқ, операторлар Европада ер усти тармоқ инфратузилмасини яратади ҳамда асосий мувофиқлаштириш ва мониторинг вазифаларини бажаради. Бироқ улар сунъий йўлдошлар гуруҳини бевосита молиялаштиришни режалаштирмаяпти. Бунинг ўрнига космик инфратузилма ва зарур техник тажрибани тақдим этадиган сунъий йўлдош ҳамкори танланади.
Ҳамкорлик операторларнинг мавжуд мобил тармоқлари, мижозлар базаси ва бозорга чиқиш имкониятларини сунъий йўлдош алоқаси провайдерининг технологиялари ҳамда сунъий йўлдош тизимларини жойлаштириш бўйича тажрибаси билан бирлаштиради.
Шу билан бирга, ниятлар тўғрисидаги баённома операторларнинг амалдаги сунъий йўлдош ҳамкорликларини алмаштирмайди. Компаниялар ҳозирча сунъий йўлдош соҳасидаги ҳамкорни танламаган ва биргаликда ариза бериш бўйича якуний қарор қабул қилмаган.
Аввалроқ SpaceX компанияси АҚШда умуммиллий симсиз алоқа частоталаридан фойдаланиш лицензияларини сотиб олиш бўйича келишув эълон қилгани маълум бўлган эди.
Эслатиб ўтамиз, аввалроқ Илон Маск болаларга SpaceX акцияларини тарқатишини маълум қилгани ҳақида хабар берилган эди.
