Европанинг Шенген ҳудудига яна 2 та давлат кириши мумкин
Сешанба куни Страсбургда (Франция) бўлиб ўтган ялпи мажлисда қабул қилинган резолюцияда Европарламент аъзолари Европа кенгаши Руминия ва Болгариянинг Шенген ҳудудига қўшилиши тўғрисида 2022 йил охиригача қарор қабул қилиши кераклигини таъкидлади.
Бу 2023 йил бошидан икки давлатнинг барча ички чегараларида юзма-юз текширувлар бекор қилинишини таъминлаши керак. Қарорни 547 нафар депутат қўллаб-қувватлади, 49 нафари қарши чиқди, яна 43 нафар депутат овоз беришда бетараф қолди.
Шенген ҳудуди «Европа Иттифоқининг энг катта ютуқларидан бири» эканини таъкидлаган Европарламент депутатлари Европа кенгашини зарур шартларни бажариб бўлган Болгария ва Руминияни қабул қилиш тўғрисида қарор қабул қилмагани учун танқид қилди.
Депутатларнинг фикрича, ички чегара назоратини амалга ошириш камситувчи хусусиятга эга ва ҳаракатдаги ишчилар ва фуқаролар ҳаётига жиддий таъсир кўрсатади. Уларга кўра, импорт, экспорт ва юк портларидан товарларнинг эркин ўтишига тўсқинлик қилиб, Европа Иттифоқининг ягона бозорига ҳам зарар етказмоқда.
Ҳозирда Болгария, Хорватия, Кипр, Ирландия ва Руминиядан ташқари, Европа Иттифоқига аъзо барча давлатлар Шенген ҳудудига киради. Улар орасида Европа Иттифоқига аъзо бўлмаган давлатлар Исландия, Норвегия, Швейцария ва Лихтенштейн ҳам бор.
Очиқ манбалардан олинган фотосурат
