Европада Қозоғистон ташувчилари учун ҳеч қандай тўсиқ йўқ – ТИВ

NUR-SULTAN. Kazinform – Қозоғистон Ташқи ишлар вазирлиги Россиянинг транспорт-логистика компанияларига қўйилган санкцияларнинг Қозоғистоннинг халқаро юк ташиш корхоналарига салбий таъсири бўйича вазиятни диққат билан кузатиб бормоқда, дея хабар бермоқда Kazinform.

Маҳаллий тадбиркор, «Kusto Group» компаниясининг асосчиси Қ.Кўпбаевнинг Қозоғистон юкларини халқаро ва Европа денгиз портлари орқали юклаш ва ташишдаги қийинчиликлар ҳақидаги саволини инобатга олиб, Қозоғистоннинг хорижий агентликлари Европанинг йирик портлари (Зебрюгге, Антверпен, Мууга, Рига, Вентспилс, Лиепая) маъмуриятлари билан зарур алоқаларни ўрнатди ва маслаҳатлар ўтказилди.

Олинган маълумотларга кўра, ҳозирда Қозоғистон ташувчилари билан ишлашда ҳеч қандай чекловлар йўқ.

Бундан ташқари, Қозоғистон юкларини ташишда кечикишларнинг юзага келиши, мавжуд логистика занжирларининг ўзаро чамбарчас боғлиқлигини ҳисобга олиб, бу Россия компанияларига қўйилган чекловлар билан боғлиқ бўлиши мумкинлиги айтилмоқда.

Маҳаллий компаниялар халқаро суғурта қилишдан бош тортилган Россия кемаларида юкларни ташишда қийинчиликларга дуч келиши мумкин.

Қозоғистон товарлари ва юкларини ташишда ҳақиқий кечикишлар юзага келган тақдирда, Ташқи ишлар вазирлиги Қозоғистон Республикасининг хориждаги муассасалари билан биргаликда муаммоларни ҳал қилишда ёрдам беришга тайёр.