Европа Иттифоқи аҳолини инқироз пайтида 72 соат давомида мустақил яшашга тайёрламоқда
ASTANА. Кazinform — Европа Комиссияси аҳолини фавқулодда вазиятларга тайёрлаш бўйича кўрсатмаларни эълон қилди. Ҳужжатда фуқароларга инқирознинг дастлабки уч кунида мустақил равишда ўз эҳтиёжларини қондиришга имкон берадиган асосий буюмлар ва воситаларни олдиндан тайёрлаш тавсия этилади. Бу ҳақда Кazinform агентлиги Anadoluга таяниб хабар берди.
Янги кўрсатмаларни Европа Комиссиясининг тенглик, инқирозга тайёргарлик ва инқирозларни бошқариш бўйича масъул аъзоси Хаджа Лахбиб Брюсселда бўлиб ўтган 9-Европа фуқаролик ҳимояси форумида тақдим этди.
Европа Комиссиясининг маълумотларига кўра, сўнгги йилларда Европа тобора жиддий инқирозларни бошдан кечирмоқда. Шу муносабат билан аҳолининг мумкин бўлган фавқулодда вазиятларга тайёрлигини ошириш зарур.
Тавсияларга кўра, фуқаролар инқироз бошланганидан кейинги дастлабки 72 соат ичида, давлат ёрдами келгунига қадар, ўзларининг асосий эҳтиёжларини мустақил равишда қондириш учун етарли бўлган озиқ-овқат ва зарур нарсалар захирасини олдиндан тайёрлашлари керак.
Бундан ташқари, Европа Комиссияси мактабгача ва бошланғич таълим дастурларига фавқулодда вазиятларга тайёргарлик дарсларини киритишни тавсия қилади. Шунингдек, ўқитувчилар учун махсус тадбирлар ўтказиш ва тайёргарлик чораларини ишлаб чиқишда ногиронлиги бўлган одамларнинг эҳтиёжларини ҳисобга олиш зарур.
Аҳолини хабардор қилишга ҳам алоҳида эътибор қаратилмоқда. Ҳокимият органлари фуқароларга фавқулодда вазиятдан олдин, фавқулодда вазият пайтида ва ундан кейин ишончли маълумотларни тақдим этишлари керак.
Шунингдек, 2027 йилдан бошлаб ҳар йили 23 октябрни Европа Иттифоқининг инқирозга тайёргарлик куни сифатида нишонлаш таклиф қилинмоқда. Ушбу ташаббус жамоатчиликнинг хабардорлигини ошириш ва Европадаги инқирозли вазиятларга тайёргарлик маданиятини яратишга қаратилган.
Эслатиб ўтамиз, Европа Иттифоқида газ захиралари сўнгги 15 йил ичидаги энг паст даражага тушди.
