Европа денгизларида медузалар сони ортиб бормоқда

ASTANA. Kazinform – Шотландия қирғоқларида медузалар сони сезиларли даражада ошди. Олимлар эҳтиёт бўлишга ва уй ҳайвонларини кўздан қочирмасликка чақиряпти, дея хабар беради Kazinform Euronewsга таяниб.

Денгизларни муҳофаза қилиш жамияти (MSC) хабар беришича, кейинги бир неча йил ичида мамлакат Европада кенг тарқалган бу жонзотнинг рекорд сонини кўрган.

Шотландия тоғлари, Ташқи Гебрид ороллари ва Айршир аҳолиси медузаларнинг кўплиги ҳақида хабар берган. Бироқ, Шотландия бўйича MSC эксперти Кэтрин Геммеллнинг таъкидлашича, бу кўрсаткич йил учун рекорд бўлди дейишга ҳали эрта.

MSC 20 йил давомида медузаларнинг ҳисобини юритиб келади ва маҳаллий аҳолини жонзотларнинг ҳар қандай кўриниши ҳақида ташкилот веб-сайтида хабар беришга ундайди.

Медузалар океан ҳароратининг ўзгариши кўрсаткичлари ҳисобланади, шунинг учун олимлар уларнинг хатти-ҳаракатларини кузатадилар.

Шотландия қирғоқларида медузаларнинг турли турлари, жумладан қулоқли медуза ва тукли цианея топилган. Буларнинг барчаси чақиши мумкин, шунинг учун улар қирғоқда ўлик ҳолда ётган бўлса ҳам, уларга тегмаган маъқул.

Медузалар одамлар учун айниқса хавфли бўлмаса-да, улар уй ҳайвонлари учун хавфлидир. Шунинг учун саёҳатчиларга итлар билан юришда эҳтиёт бўлиш тавсия этилади.

Шотландия медузалар босқинидан жабрланган ягона давлат эмас. Айнан шу ҳафтада Ўрта ер денгизи ер юзидаги энг иссиқ ҳароратга эга бўлди - 28,7 ° C. Чунки медузалар илиқ, кислородсиз сувларда ўзини яхши ҳис қилади.

Бу йил Мальта ва Гоцо қирғоқларида минглаб медузалар ювилиб, маҳаллий аҳоли ва сайёҳлар кўплаб машҳур бандаргоҳларда чўмила олмади.