Ерлан Қарин: Бугун мамлакатда атом электр станциялари қурилиши билан боғлиқ ахборот-тушунтириш ишлари якунланади

ASTANA. Kazinform – Бугун Қозоғистонда атом электр станциясини қуриш масаласи бўйича референдум доирасида 400 кунлик ахборотлаштириш ишлари якунланади. Бу ҳақда Қозоғистон Республикаси Давлат маслаҳатчиси Ерлан Қарин маълум қилди.

“Буни Қозоғистон сиёсий тарихидаги энг узоқ давом этган кампания дейишга барча асослар бор. Нега 400 кун? Чунки, Давлатимиз раҳбари ўзининг навбатдаги Мурожаатномасида ўтган йили, яъни 2023 йил 1 сентябрда референдум ўтказиш ғоясини билдирган эди. Айтиш мумкинки, референдум бўйича кенг кўламли ишлар худди шу куни бошланди. Шу вақт ичида ҳар бир ҳудудда жамоатчилик эшитувлари ташкил этилди, экспертлар ва жамоатчилик фаоллари ахборот майдонида атрофлича фикр алмашди”, – деб ёзди Ерлан Қарин ўзининг Telegram-каналида.

Давлат маслаҳатчиси ушбу акция тинч, ўзаро ҳамжиҳатлик шароитида ўтганини таъкидлади. Унинг сўзларига кўра, референдум давомида мамлакатдаги жамоат кучлари илк бор ўз саъй-ҳаракатларини сиёсий эмас, иқтисодий манфаатлар нуқтаи назаридан бирлаштирганини таъкидлаш лозим.

«AMANAT» партияси ташаббуси билан 6 та сиёсий партия ва 20 дан ортиқ жамоат бирлашмалари томонидан Атом электр станцияси қурилишига кўмаклашувчи халқ штаблари ташкил этилди. Штаб аъзолари барча вилоятлар аҳолиси билан учрашув ўтказди, унда энергетика соҳасининг етакчи эксперт ва мутахассислари иштирок этди. Шу тариқа фуқароларимизга Қозоғистонда атом энергетикасини ривожлантириш борасида жиддий тўхташ имконияти берилди”, – деди Давлат маслаҳатчиси.