Эрдоған Туркманистоннинг фахрий оқсоқоли бўлди

ASTANA. Kazinform – Бугун, 26 февраль куни Туркия Президенти Режеп Таййип Эрдоған 70 ёшни қаршилади. Шу муносабат билан Туркманистон Президенти Сердар Бердимуҳамедов Эрдоғанга “Туркманистон фахрий оқсоқоли” унвонини беришга қарор қилди. Бу ҳақда “Нейтральный Туркменистан” газетаси хабар берди.

Режеп Таййип Эрдоған
Фото: Анадолу

“Туркман халқига кўп асрлик яхши қўшничилик ва кекса авлод вакилларини ҳурмат қилиш анъаналарига амал қилиб, Туркманистон-Туркия муносабатларини ривожлантиришга қўшган улкан шахсий ҳиссангизни, халқларимиз ҳамжиҳатлиги йўлидаги хизматларингизни юксак қадрлаган ҳолда, 70 йиллик юбилейингиз муносабати билан сизга «Hormatly il ýaşulusy» (“Туркманистон фахрий оқсоқоли”) фахрий унвонини беришга қарор қилинди”, – дейилади Бердимуҳамедовнинг Эрдоғанга йўллаган табрик мактубида.

Бердимуҳамедовнинг ёзишича, мамлакат ташқи сиёсатининг муҳим йўналишларидан бири Туркия билан турли соҳаларда стратегик ва узоқ муддатли муносабатларни изчил ривожлантириш ва мустаҳкамлашдан иборат. Туркманистон Президенти, шунингдек, икки давлат халқаро ташкилотлар, жумладан, Бирлашган Миллатлар Ташкилоти ва Туркий Давлатлар Ташкилоти доирасидаги муваффақиятли ҳамкорликни ҳам қайд этди.

Унинг сўзларига кўра, Туркия Туркманистоннинг энг йирик ташқи савдо шерикларидан бири бўлиб, мамлакатда иқтисодий лойиҳаларни амалга оширишда иштирок этаётган кўплаб турк компаниялари Туркманистон иқтисодиётини диверсификация қилиш ва ижтимоий лойиҳаларни амалга оширишга ҳисса қўшмоқда.

Бердимуҳамедов бутун туркман халқи номидан Эрдоғанни самимий табриклаб, мустаҳкам соғлик, бахт ва оилавий тотувлик, Туркия Республикаси халқига эса тинчлик, янада тараққиёт ва фаровонлик тилаган.

Маълумот учун, Режеп Таййип Эрдоған 1954 йил 26 февралда Истанбулнинг Бейоғлу туманидаги Касимпаша маҳалласида туғилган. У 2014 йил 28 августдан бери Туркиянинг амалдаги Президенти саналади. Бунгача Эрдоған 2003-2014 йилларда Туркия Бош вазири, 1994-1998 йилларда Истанбул мэри лавозимларида ишлаган. У иқтидордаги “Адолат ва тараққиёт” партиясининг асосчиси ҳисобланади.

Сўнгги хабарлар