ЕОИИ давлатларининг ишлаб чиқариш салоҳиятини амалга ошириш 600 миллион кишини боқиш имконини беради – Қозоғистон Президенти

ЕОИИ мамлакатлари ишлаб чиқариш салоҳиятини тўлиқ ишга солиш 600 миллион кишини боқиш имконини беради. Бу ҳақда Қозоғистон ва Россиянинг ХIХ ҳудудлараро ҳамкорлик форумида Давлат раҳбари Қасим-Жомарт Тоқаев маълум қилди, дея хабар беради Kazinform.

“Маълумки, сўнгги пайтларда глобал озиқ-овқат хавфсизлигига иқлим ўзгариши, сиёсий ва иқтисодий беқарорлик, халқаро таъминот занжирларининг узилиши каби омиллар салбий таъсир кўрсатмоқда. Дунёда очлик ва озиқ-овқат тақчиллигидан азият чекаётганлар сони 830 миллионга етди. Бундан ташқари, БМТ 2050 йилга бориб дунё аҳолиси яна 2 миллиард кишига кўпайишини тахмин қилмоқда. Мутахассисларнинг ҳисоб-китобларига кўра, ЕОИИ давлатларининг ишлаб чиқариш, ресурс ва экспорт салоҳиятини тўлиқ жорий этиш 600 миллионга яқин аҳолини боқиш имконини беради. Бу прогнозлар жуда реалдир”, - деди Қасим-Жомарт Тоқаев.

Президентнинг сўзларига кўра, Қозоғистонда қишлоқ хўжалиги ялпи ички маҳсулоти ҳажми сўнгги беш йилда икки баробардан зиёд ошди. Қишлоқ хўжалиги маҳсулотлари экспорти икки баробарга ошиб, 6 миллиард долларга етди.

“Қишлоқ хўжалиги маҳсулотларимиз дунёнинг 80 та давлатига етказиб берилмоқда. 2022 йилда Қозоғистон озиқ-овқат хавфсизлиги бўйича жаҳон индексида 113 давлат орасида 32-ўринни эгаллади”, – деди Давлат раҳбари.