Энди хорижликлар учун Айя-София масжидига кириш пуллик бўлади

Жорий йилнинг 15 январидан чет эллик сайёҳлар учун Туркиянинг Истанбул шаҳридаги Айя-София масжидига кириш пуллик бўлади. Бу ҳақда Туркия Маданият ва туризм вазирлиги маълум қилди, деб хабар беради Kazinform агентлиги NTVга таяниб.

Вазирликнинг баёнотига кўра, Айя-София масжидида Маданият ва туризм вазири Мехмет Ерсой ташаббуси билан бошланган реставрация ва консервация ишлари доирасида ташриф буюрувчилар учун тайёрланган 3-галереядаги Аҳмет фаввораси қаршисида жойлашган чипта кассаси иш бошлайди. Шунингдек, чет эллик сайёҳларга Айя-Софияни зиёрат қилишлари учун масжидга алоҳида кириш жойи ажратилиб, экскурсия йўналиши бўйлаб хавфсизлик камералари, ёнғинни аниқловчи қурилма ва фавқулодда хабар бериш тизимлари ўрнатилган.

Маълумотларга кўра, Айя-Софияни зиёрат қилмоқчи бўлган хорижлик сайёҳлар 25 евро (таҳминан 12 370 тенге) тўлайди.

Эслатиб ўтамиз, вазирлик бу қарорга 2023 йилнинг октябрь ойида келган эди. 2020 йилнинг июль ойида Туркия Давлат кенгаши Истанбулдаги Айя-Софияни музейга айлантириш тўғрисидаги 1934 йилда қабул қилинган Мустафо Камол Отатурк фармойишини бекор қилди. Шундан сўнг, ушбу мажмуадан масжид сифатида фойдаланилиши маълум бўлди.

Маълумот ўрнида, ушбу ибодатхона Византия императори Константин II тарафидан милодий 360 йилда бунёд этилган. У ёғочдан қурилган бўлгани учун 404 йилга келиб ёниб кетган. Ўша йили ибодатхона биринчи бор таъмирланган. Масжиднинг ҳозирги биноси эса Византия императори Юстиниан биринчининг буйруғига кўра, 532-537 йилларда барпо этилган. Унинг қурилиши 5 йил-у 10 ой давом этган. Унда 10 мингдан ортиқ қурувчи меҳнат қилган.