ЕИнинг ташқи ишлар бўйича олий вакили 28 март куни Қозоғистонга келади
ASTANА. Кazinform - Европа Иттифоқининг (ЕИ) ташқи ишлар ва хавфсизлик сиёсати бўйича Олий вакили – Еврокомиссия вице-президенти Кая Каллас Туркманистон, Ўзбекистон ва Қозоғистонга ташриф буюради, дея хабар беради Европа Иттифоқининг Қозоғистондаги Ваколатхонаси.
27 март куни Кая Каллас Ашхободда бўлиб ўтадиган “Европа Иттифоқи – Марказий Осиё” ХХ вазирлар йиғилишига раислик қилади. Йиғилишда Қирғизистон, Тожикистон, Туркманистон, Ўзбекистон ва Қозоғистондан вакиллар иштирок этади.
Йиғилишда томонлар 2025 йил 3-4-апрель кунлари Самарқандда (Ўзбекистон) бўлиб ўтадиган биринчи “Европа Иттифоқи – Марказий Осиё” саммитига тайёргарлик жараёнини муҳокама қилади. Бундан ташқари, минтақа учун муҳим бўлган қатор мавзулар, жумладан, Россия-Украина урушининг минтақавий оқибатлари, транспорт ва рақамли коммуникациялар, муҳим хомашё, энергетика ва таълим ресурслари, халқаро тадқиқотлар ва таълим масалалари муҳокама қилинади.
Йиғилиш олдидан Олий вакил Туркманистон ташқи ишлар вазири Рашид Мередов, Тожикистон ташқи ишлар вазири Сирожидин Муҳриддин, шунингдек, Туркманистон президенти Сердар Бердимуҳамедов билан учрашувлар ўтказади.
Вазирлар йиғилиши якунлари бўйича 27 март куни соат 14:45 да Кая Каллас иштирокида матбуот анжумани ўтказилади.
Олий вакил Тошкентга бориб, Ўзбекистон ташқи ишлар вазири Бахтиёр Саидов ва Президент Шавкат Мирзиёев билан учрашади.
Шундан сўнг, 28 март куни у Алматига келади ва Қозоғистон Ташқи ишлар вазири Мурат Нуртилеу ва Қозоғистон Президенти Қасим-Жомарт Тоқаев билан музокаралар ўтказади.
Эслатиб ўтамиз, аввалроқ Европа Иттифоқи ноёб металларни қазиб олишни кенгайтириши ҳақида хабар берган эдик.
