Дунёнинг энг бой беш одами Трампнинг инаугурациясидан кейин 209 млрд доллар йўқотди

Bloomberg ҳисоб-китобларига кўра, 20 январь куни Дональд Трампнинг инаугурациясидан кейин етти ҳафта ичида тадбирда қатнашган бешта энг йирик миллиардер умумий ҳисобда 209 млрд доллар йўқотди.

Aсосий сабаб янги президентнинг иқтисодий сиёсати ва компанияларнинг бозор кўрсаткичларининг ёмонлашуви туфайли технологик гигантлар акцияларининг кескин пасайиши бўлди.

Энг кўп зарар кўрган Илон Маск бўлиб, унинг бойлиги $148 млрдга камайди — бу миллиардерлар орасида энг катта пасайишдир. Декабр ойида унинг капитали рекорд даражадаги $486 млрдга етди, аммо сайловлардан сўнг Tesls акциялари кескин пасайишни бошлади ва энг юқори кўрсаткичларнинг 55%ини йўқотди.

10 март куни компания қоғозлари 15,4%га тушиб кетди — бу 2020-йилдан бери энг ёмон кўрсаткич бўлиб, Tesla бозор капиталлашувининг $125 млрдга пасайишига олиб келди.

Трамп “Truth Social"да акцияларнинг қулашига жавобан Teslaни қўллаб-қувватлаб, янги электромобил сотиб олишини айтди.

Шундан сўнг компания акциялари савдо олдидан 5%га кўтарилди, бироқ таҳлилчилар буни вақтинчалик таъсир деб ҳисоблашмоқда.

Мутахассисларнинг таъкидлашича, Teslaнинг асосий муаммоси сиёсат эмас, балки рақобат ва паст савдо кўрсаткичларидир. Хитойнинг “BYD” компанияси аллақачон электромобиллар савдоси бўйича “Тесла"ни ортда қолдирган, “Модел 2” арзон моделидан ($25 мингга) воз кечиш эса талабга путур етказди.

Бошқа миллиардерлар қандай зарар кўрди?

Сайловдан кейин AҚШ фонд бозори ўсишни кўрсатди, аммо Трампнинг иқтисодий сиёсати инвесторларнинг кайфиятини кескин ўзгартирди. Канада, Хитой ва Мексикадан товарлар учун янги божлар, шунингдек, иқтисодиётдаги ноаниқлик S&P 500 индексининг 6,4%га пасайишига олиб келди, бу эса энг йирик корпорацияларга зарба берди.

Жефф Безос Amazon акциялари 17 январдан бери 14%га тушиб кетгани туфайли $29 млрд йўқотди. Компаниялар учун рақобатга дош бериш қийин ва Хитой товарларига бож тўловларининг ошиши логистика харажатларини ошириши мумкин.

Сергей Брин $22 млрд.дан маҳрум бўлди. Googleга эгалик қилувчи Alphabet регуляторлар босимига, шунингдек, реклама даромадлари ўсишининг секинлашишига дуч келди.

Марк Цукерберг $5 млрд йўқотди. Meta компанияси январ ойида бозор қийматининг кескин ўсишини бошдан кечирган бўлса-да, кейинчалик акциялар бу ўсишнинг барча натижаларини йўқотди.

Бернар Aрно ҳам $5 млрд йўқотди, чунки LVMH акциялари сайловдан сўнг дастлаб 20%га кўтарилган бўлса-да, кейинчалик ҳашаматли товарларга бўлган талабнинг пасайиши оқибатида яна пастга тушди.

Эслатиб ўтамиз, аввалроқ Tesla акциялари 15 фоизга тушиб кетгани ҳақида хабар берган эдик.