12:11, 05 Апрель 2024 | GMT +6
Дунёдаги энг катта рақамли камера йиғилди
Миллий тезлатгичлар лабораторияси мутахассислари дунёдаги энг катта рақамли камерани йиғди. Камера Чилидаги Вера Рубин обсерваторияси телескопига ўрнатилади.
Камерани яратишга қарийб 20 йил сарфланди. Катталиги енгил машинача келадиган камеранинг оғирлиги салкам уч тонна.
Улкан камера 3,2 гигапикселли фотосуратлар олади. Олимларнинг айтишича, у билан 25 километр олисдаги гольф коптокчасини ҳам кўриш мумкин.
Камера олд линзаси диаметри 1,5 метрдан ошади, иккинчи линзаси диаметри 90 сантиметр, шовқин даражасини пасайтириш учун криостат билан Цельсий бўйича –100 даражагача совитилади.
Энди камера транспорт контейнерига жойланиб, Чилига жўнатилади. Унинг ёрдамида астрономик кузатувлар олиб борилади.
