Дунёни пиёда кезиш учун йўлга чиққан қозоғистонлик оқсоқол Россия чегарасига етиб борди
Улитау вилоятида яшовчи 73 ёшли саёҳатчи Сарсенбай Қотирашов 2 август куни Атираудан жўнаб кетди.
Саёҳатчи бугун, 8 август куни Қозоғистон-Россия чегарасига етиб борди. Бу ҳақда саёҳатчи ўзининг Instagram саҳифасида хабар берди.
«Мен чегарага етиб келдим. Мен биринчи чегарани кесиб ўтмоқчиман. Атираудан 300 километрдан ортиқ масофани пиёда босиб ўтдим. Йўлнинг баъзи қисмлари ёмон, баъзи қисмлари яхши. Йўллар қуриляпти. Эҳтимол, келаси йил якунига етиб қолар. Бугун мен биринчи чегарани кўрдим ва асабийлашдим. Худо хоҳласа, ўтаман, омон бўлинг, қозоғистонликлар», – деди Сарсенбай Қотирашов.
Кекса саёҳатчи Сарсенбай Қотирашов пиёда дунё бўйлаб саёҳатга жўнаб кетиш олдидан атираулик ёшлар билан учрашди.
«Менинг пиёда саёҳатим дунёнинг бир қанча мамлакатларини қамраб олади. Мен Қозоғистонни тарк этиб, Россия, Грузия, Туркия, Болгария, Сербия, Венгрия, Австрия, Германия, Франция, АҚШ, Хитой, Мўғулистонга бораман. Кейинроқ Россия орқали Қозоғистонга қайтаман. Пиёда саёҳатимни 2025 йил август ойида якунлаш ниятим бор», – дейди Сарсенбай Қотирашов.
Сарсенбай Қотирашов пиёда саёҳатини бир неча йўналишга ажратди. Биринчи йўналиш Қозоғистон, Россия, Грузия, Туркияга бориш. Ушбу мамлакатларга ташриф буюриш учун тахминан 3 минг километр юриш керак бўлади. Саёҳат таҳминан 100 кун давом этади.
Иккинчи йўналишда эса 180 кун ичида Туркия, Франция ва АҚШга ташриф буюришни режалаштирган. Бунинг учун у 9000 километрдан ортиқ масофани босиб ўтади.
Учинчи босқичда у АҚШдан бошлаб Хитой, Мўғулистон ва Россия орқали Қозоғистонга қайтади. Бу даврда 130 кун ичида 4 минг километрдан ортиқ масофа босиб ўтилади. Икки йил ичида 16 210 километр масофани босиб ўтади.
Эслатиб ўтамиз, аввалроқ 73 ёшли оқсоқол дунё бўйлаб пиёда саёҳат қилиш учун Атираудан йўлга чиққани ҳақида ёзган эдик.
Муаллиф: Бек Мустафа
