Дубайда оғирлиги 16,5 килограмм бўлган олтин сирға Гиннеснинг рекордлар китобига кирди
ASTANA. Kazinform – Joyalukkas Jewellery заргарлик компанияси оғирлиги 16,514 килограмм бўлган олтин сирғалар жуфтини ясаб, Гиннеснинг рекордлар китобига кирди. Бу — дунёдаги энг оғир олтин сирғалар жуфти, деб хабар беради Guinness World Records ташкилоти.
Рекорд шу йилнинг 12 октябрда Бирлашган Араб Амирликларининг Дубай шаҳрида қайд этилди.
Катта сирғалар ҳинд маданиятига хос анъанавий жхумки тақинчоғининг катталаштирилган нусхаси сифатида яратилган. Жхумки — қўнғироққа ўхшаш шакли билан ажралиб турадиган анъанавий ҳинд сирғасидир. Guinness World Records маълумотларига кўра, Joyalukkas компанияси ушбу буюмни ҳинд заргарлик санъатининг маҳорат ва нафосатини намойиш этиш мақсадида тайёрлаган.
Компания ўзининг расмий Instagram саҳифасида сирғаларни «ғайриоддий, тасаввур доирасидан ташқаридаги ижод намунаси» деб таърифлаб, ташриф буюрувчиларни уларни Jewel of Joy by Joyalukkas кўргазмасида томоша қилишга таклиф этди.
Компаниянинг таъкидлашича, ушбу сирғалар икки жаҳон рекордини ўрнатган санъат асарига айланган. Бироқ Guinness World Records ташкилотининг расмий қайдида ҳозирча фақат битта рекорд — дунёдаги энг оғир олтин сирғалар жуфти унвони кўрсатилган. Иккинчи рекорд нимадан иборат экани ҳозирча аниқлаштирилмаган.
