Дональд Трампга суиқасд ҳақида янги маълумотлар пайдо бўлди
ASTANА. Кazinform — Wall Street Journal нашри АҚШ Республикачилар партияси номзоди Дональд Трампга ўқ узган 20 ёшли Томас Мэтью Крукс ҳақидаги янги маълумотларни ошкор қилди, деб ёзади BILD.
Крукс зарур ашёлар ва кимёвий моддаларни ота-онасининг уйида сақлаган. У илм-фанга қизиққан, тажриба ўтказган ва мукофотга сазовор бўлган математик бўлганлиги сабабли, унинг ота-онаси ҳеч нарсадан шубҳаланмади, деди ФҚБ махсус агенти Кевин Роджак Wall Street Journal га.
- Ота-онаси бу ҳақда ҳеч нарса билмаслигини айтишди. Улар сўроқ пайтида ўзларини ишончли тутишди ва терговга ёрдам беришди, - дея қўшимча қилди у.
Махфий хизматнинг собиқ агенти Пол Эклофф The Hillга берган интервьюсида Крукснинг руҳий саломатлиги билан боғлиқ муаммолар борлигини айтди. Аввалроқ New York Post газетаси Крукс воқеа содир бўлгунга қадар интернетдан депрессия ҳақида маълумот излаганини маълум қилган эди. Бундан ташқари, у шу йилнинг май ойида Словакия бош вазири Роберт Фицога суиқасд ҳақида ўқиган.
Эслатиб ўтамиз, Дональд Трампга АҚШнинг Пенсильвания штати, Бутлер шаҳрида сайловолди ташвиқоти пайтида суиқасд уюштирилди. У ерда 20 ёшли Томас Мэтью Крукс Трамп гапира бошлаганидан бир неча дақиқа ўтиб автоматдан ўқ узган.
