Депутатлар Сенат мажлисининг кун тартибини тасдиқладилар
ASTANA. Kazinform – Сенат Раиси Маулен Ашимбаев палата бюросининг йиғилишини ўтказди. У ерда депутатлар 16 май куни бўлиб ўтадиган Сенат мажлиси кун тартибини тасдиқладилар.
Сенаторлар палата мажлисида “1993 йил 14 январдаги Қозоғистон Республикаси билан Хитой Халқ Республикаси ўртасидаги фуқаролик ва жиноят ишлари бўйича ҳуқуқий ёрдам кўрсатиш тўғрисидаги шартномага ўзгартиришлар киритиш тўғрисидаги баённомани ратификация қилиш ҳақида”ги қонунни кўриб чиқадилар.
Ҳужжат нормалари икки давлат фуқаролари ҳуқуқларини ҳимоя қилиш самарадорлигини ошириш, шунингдек, фуқаролик ва жиноят ишлари бўйича ҳуқуқий ёрдам кўрсатиш йўналишидаги ҳамкорликни ривожлантиришга қаратилган.
Эслатиб ўтамиз, протокол икки давлат ташқи ишлар вазирлари томонидан Давлат раҳбари Қасим-Жомарт Тоқаевнинг 2023 йил 17 май куни ХХРга ташрифи чоғида имзоланган эди.
Бундан ташқари, “2014 йил 29 майдаги Евроосиё иқтисодий иттифоқи тўғрисидаги шартномага Евроосиё иқтисодий иттифоқига аъзо давлатлар саноат тармоқларида қўшма кооператив лойиҳаларни амалга оширишда молиявий ёрдам кўрсатиш бўйича ўзгартишлар киритиш тўғрисидаги баённомани ратификация қилиш ҳақида”ги қонун ҳам палата мажлисининг кун тартибига киритилади.
Қонун билан Евроосиё иқтисодий иттифоқига аъзо давлатларнинг саноат соҳасидаги қўшма кооператив лойиҳаларини молиялаштиришнинг ҳуқуқий асосларини ташкил этувчи баённомани ратификация қилиш назарда тутилган.
Ҳужжатда соҳада қўшма кооператив лойиҳаларни амалга оширишни қўллаб-қувватлашга қаратилган ўзгартиш ва қўшимчалар ҳам назарда тутилган. Унинг рўйхати ЕОИИ ҳукуматлараро кенгаши томонидан белгиланади.
