Давлат раҳбари Qarmet конвертер цехи фаолияти билан танишди
ASTANA. Kazinform — Қасим-Жомарт Тоқаевга Qarmet металлургия ишлаб чиқаришининг асосий бўғинларидан бири ҳисобланган конвертер цехи фаолияти ҳақида маълумот берилди, деб хабар беради Ақорда матбуот хизмати.
Президентга домна печида эритилган чўяннинг қандай қилиб пўлатга айлантирилиши, сўнгра узлуксиз қуйиш ускунасига ва ундан кейин прокатлаш жараёнига юборилиши кўрсатилди.
Qarmet компанияси 2024 йилда 1- ва 2-конвертерларда капитал таъмирлаш ишларини амалга ошириб, уларнинг корпусларини тўлиқ алмаштирди ва янада замонавий конструкцияларни ўрнатди.
Модернизация ишлари ишлаб чиқариладиган маҳсулот турларини кўпайтириш, эритилган пўлат ҳажмини ошириш ҳамда ускуналар ишончлилигини кучайтириш имконини беради.
Шу билан бирга, цехдаги бир қатор технологик жараёнларни табиий газга ўтказиш ишлари давом эттирилмоқда.
Qarmet директорлар кенгаши раиси Андрей Лаврентьев Давлат раҳбарига ишлаб чиқариш кўрсаткичларининг ўсиши ва инвестиция дастурларини амалга ошириш жараёни ҳақида ҳисобот берди.
2026 йил якунларига кўра, 4 миллион тонна пўлат, 3,6 миллион тонна кўмир ва 3,9 миллион тонна темир рудаси концентрати ишлаб чиқариш режалаштирилган.
Компания фаолияти бошланганидан бери инвестициялар ҳажми 2,7 миллиард доллардан ошди.
Ушбу маблағлар ишлаб чиқариш қувватларини модернизация қилиш ва янги саноат объектини қуришга йўналтирилди.
Qarmet — Қозоғистонда тўлиқ ишлаб чиқариш циклига эга бўлган энг йирик тоғ-кон металлургия компаниясидир.
Марказий Осиёда ўзининг кўмир ва темир рудаси конлари, шунингдек, энергетика базасига эга бўлган интеграциялашган тоғ-кон металлургия мажмуаси ҳисобланади.
Компанияда қарийб 35 минг нафар ходим меҳнат қилади. Уларнинг 14 минг нафардан ортиғи Темиртаудаги металлургия комбинатида ишлайди.
