Давлат раҳбари Linde GmbH компанияси катта вице-президентини қабул қилди
Қозоғистон Президенти Қасим-Жомарт Тоқаев Linde GmbH компанияси катта вице-президенти Оливер Пфанни қабул қилди, дея хабар беради Кazinform Ақорда матбуот хизматига таяниб.
Linde GmbH компаниясининг Яқин Шарқ, Европа ва Африка бўйича катта вице-президенти Оливер Пфанн билан суҳбат чоғида газ ва муҳандислик технологиялари соҳасидаги ҳамкорлик масалалари муҳокама қилинди.
Давлат раҳбари “ҚазМунайГаз” МК” АЖ ва Linde GmbH ўртасида мамлакатда мавжуд ва истиқболдаги нефть-кимё лойиҳаларини амалга оширишни назарда тутувчи ҳамкорлик ва англашув меморандуми имзоланганини мамнуният билан қабул қилди.
Олдин эришилган келишувларга мувофиқ, Linde компанияси ўз технологияси асосида полиэтилен ишлаб чиқаришда қўлланиладиган этан крекинг ва ҳаво ажратиш (азот, техник ҳаво) қурилмаларининг кенгайтирилган асосий лойиҳасини ишлаб чиқмоқда.
Шунингдек, Президентга компаниянинг йилига 1,3 миллион тонна карбамид ишлаб чиқариш лойиҳасида қўшма инвестор сифатида иштирок этишдан манфаатдорлиги ҳақида сўзлаб берилди.
Қасим-Жомарт Тоқаев ушбу ишлаб чиқариш нафақат нефть-кимё саноатини ривожлантириш, балки қишлоқ хўжалиги, айниқса, шоли ва ғалла етиштиришда ҳам катта аҳамиятга эга эканини таъкидлади.
Оливер Пфанн минтақавий бозор истиқболларини таъкидлади ва Linde Қозоғистоннинг нефть-кимё ва газ-кимё саноатида инновацион ва барқарор ечимларни жорий этишда узоқ муддатли ва самарали ҳамкорликка тайёрлигини таъкидлади.
Linde GmbH машинасозлик ва саноат газларини лойиҳалаш ва ишлаб чиқариш соҳасида етакчи глобал компания ҳисобланади. 2022 йилда компаниянинг йиллик айланмаси 33,36 миллиард еврони ташкил қилди. Компанияда бутун дунё бўйлаб 60 мингдан ортиқ ходим ишлайди.
