Давлат раҳбари Дания Ташқи ишлар вазири Ларс Лёкке Расмуссенни қабул қилди
ASTANА. Кazinform — Президент Қасим-Жомарт Тоқаев Ақордада Астанага расмий ташриф билан келган Дания Қироллиги Ташқи ишлар вазири Ларс Лёкке Расмуссен билан учрашди, деб хабар беради Ақорда матбуот хизмати.
Давлат раҳбари Данияни Қозоғистоннинг Шимолий Европа ва Европа Иттифоқидаги ишончли ҳамкори деб атади. Келгуси йил икки мамлакат ўртасида дипломатик муносабатлар ўрнатилганига 35 йил тўлади.
— Биз Данияни Европадаги обрўли ва нуфузли давлат ва ишончли ҳамкор деб биламиз. Ишончим комилки, икки томонлама ҳамкорлигимизнинг салоҳияти жуда катта. Ушбу имкониятлардан тўлиқ фойдаланиш учун томонлар бу йўналишда фаол ва мақсадли ишлашлари керак, — деди Қасим-Жомарт Тоқаев.
Учрашувда савдо-иқтисодий ва инвестиция алоқалари ривожланишининг ижобий динамикаси қайд этилди.
Шу билан бирга, Президентнинг сўзларига кўра, ўзаро ҳамкорликни чуқурлаштириш учун кенг имкониятлар мавжуд.
Давлат раҳбари Carlsberg компаниясининг Алмати вилоятида флагман инвестиция лойиҳасини амалга оширишини олқишлади ва компаниянинг Қозоғистонда озиқ-овқат саноатини ривожлантиришга қўшган ҳиссасини юқори баҳолади.
Дания ташқи ишлар вазири Қозоғистонни яқинлашиб келаётган мустақилликнинг 35 йиллиги билан табриклади ва мамлакатимизнинг йиллар давомида эришган муҳим ютуқларини таъкидлади.
Бундан ташқари, у Даниянинг Қозоғистон билан сиёсий мулоқотни янада мустаҳкамлаш ва савдо-иқтисодий ҳамкорликни фаоллаштириш ниятини тасдиқлади.
— Қозоғистон Марказий Осиёдаги йирик иқтисодиётдир. Бу ерда кўплаб Дания компаниялари фаолият юритади. Улар келажакда ушбу ҳамкорликни кенгайтиришдан манфаатдор, — деди Дания Ташқи ишлар вазири.
Бундан ташқари, Қасим-Жомарт Тоқаев ва Ларс Лёкке Расмуссен транспорт ва логистика, рақамли трансформация, сунъий интеллект, муҳим минераллар, қишлоқ хўжалиги ва сув хавфсизлиги соҳаларида ҳамкорликни мустаҳкамлаш истиқболлари бўйича фикр алмашдилар.
