Давлат раҳбари Алмати шаҳри ҳокими Ерболат Досаевни қабул қилди
ASTANА. Кazinform — Президент Қасим-Жомарт Тоқаев Алмати шаҳри ҳокими Ерболат Досаевни қабул қилди. Бу ҳақда Ақорда матбуот хизмати хабар беради.
Алмати шаҳри ҳокими Ерболат Досаев Президентга Алмати шаҳрини жорий йилнинг биринчи ярмида ижтимоий-иқтисодий ривожлантиришнинг дастлабки якунлари ҳақида ҳисобот берди. Унинг сўзларига кўра, қайд этилган даврда Алматида сармоявий фаровонликнинг юқори суръати кузатилмоқда.
“Асосий капиталга киритилган инвестициялар ҳажми 15,8 фоизга ошиб, 714,8 миллиард тенгега етди. Хусусий инвестициялар 21,1 фоизга ошди, жумладан, ахборот технологиялари, шунингдек, туризм, ишлаб чиқариш, соғлиқни сақлаш ва транспорт соҳаларида ўсиш мавжуд. Йил охиригача 2 триллион тенге сармоя киритилиши режалаштирилган. 2024 йил бошидан буён 32,7 мингта иш ўрни очилди. Уларнинг 75 фоизи доимий иш ўринларидир”, - деди Ерболат Досаев.
Шаҳар ҳокими, шунингдек, Қасим-Жомарт Тоқаевга жамоат транспортини модернизация қилиш ва уни экологик талабларга мослаштириш бўйича кўрилаётган чора-тадбирлар ҳақида маълумот берди.
“Жорий йилда экологик тоза жамоат транспорти улуши 70 фоизгача ошади. Ўтган йили бу кўрсаткич 53,7 фоизни ташкил этган эди. Йил охиригача маҳаллий бюджет ҳисобидан 600 газда газ билан ҳаракатланувчи автобус, 100 электробус, 112 троллейбус харид қилинади. Шунингдек, шаҳарнинг троллейбус парки тўлиқ янгиланади”, — деди Алмати ҳокими.
Президентга шаҳарнинг юқори қисмини сув билан таъминлашнинг захира схемасини яратиш бўйича топшириқ ижроси ҳақида маълумот берилди.
“Ушбу йўналишдаги қурилиш ишлари жорий йилнинг июль ойида якунланиб, 6 та янги скважина ва 1,5 километр магистрал қувур фойдаланишга топширилди. Натижада, қўшимча схеманинг қуввати 60 фоизга ошди. Бу Медеу туманининг 50 минг аҳолисини узлуксиз сув билан таъминлаш имконини беради”, — деди Ерболат Досаев.
Ерболат Досаевнинг айтишича, ижтимоий инфратузилмани ривожлантиришга алоҳида эътибор қаратилмоқда. Жорий йилда 4 та тиббий-санитария бирламчи тиббий ёрдам пункти қурилиши, 12 та поликлиникани капитал таъмирлаш ишлари якунланади. Бундан ташқари, йил охиригача 11 та янги бирламчи тиббий ёрдам кўрсатиш шохобчаси ва поликлиника қурилади. Жорий йилнинг июнь ойида Алмати шаҳридаги Перинатология ва болалар кардиожарроҳлик марказида “Феталь жарроҳлиги” пилот лойиҳаси амалга оширилди. Ушбу лойиҳа мамлакатда биринчи марта амалга оширилмоқда.
Давлат раҳбарига мактаблардаги ўринлар тақчиллигини камайтириш борасида амалга оширилаётган ишлар ҳақида сўзлаб берилди. Йил охиригача маҳаллий бюджет ҳисобидан 3,7 минг ўринли 8 та объект фойдаланишга топширилади. Бундан ташқари, 6,4 минг ўринли 10 та хусусий мактаб очилади.
Президент Қасим-Жомарт Тоқаев Алмати иқтисодиётини диверсификация қилиш доирасида ишлаб чиқариш саноатини ривожлантириш, шунингдек, кичик ва ўрта бизнес улушининг ўсиши ҳисобига даромадларни янада оширишга эътибор қаратиш бўйича топшириқ берди.
