Дархан Жазиқбай Кореянинг Персонални бошқариш вазири Ким Син Хо билан учрашди

ASTANА. Кazinform – Қозоғистон Давлат хизмати ишлари агентлиги раиси Дархан Жазиқбай Корея Республикасининг Персонални бошқариш вазири Ким Син Хо билан учрашди.

Учрашувда томонлар имзоланган давлат хизматида персонални бошқариш бўйича ўзаро англашув ва ҳамкорлик тўғрисидаги меморандумдаги чора-тадбирларнинг амалга оширилишини муҳокама қилдилар.

“Дархан Жазиқбай Давлат раҳбари томонидан давлат хизматини тубдан модернизация қилиш ва бу йўналишда рақамли технологиялардан фойдаланиш бўйича белгиланган вазифаларга мувофиқ агентлик томонидан амалга оширилаётган чора-тадбирлар билан таништирди. Агентлик раҳбари, шунингдек, давлат хизматида инсон ресурсларини такомиллаштириш, HR воситаларини жорий этиш, «e-Qyzmet» тизими асосида саралаш ва персонални бошқариш тизимини рақамлаштириш бўйича лойиҳа ва ташаббусларга эътибор қаратди”, — дейилади агентлик хабарида.

Ким Син Хо давлат хизматини замон талаблари асосида мунтазам такомиллаштириш муҳимлигини таъкидлаб, ўз мамлакатининг давлат хизмати соҳасидаги тажрибаси билан ўртоқлашди.

Шунингдек, томонлар давлат хизматчиларининг инсон ресурсларини бошқариш соҳасида малакасини ошириш мақсадида уларнинг қисқа муддатли амалиёт ва узоқ муддатли малака оширишларини ташкил этиш имкониятларини муҳокама қилдилар.

Давлат хизмати ишлари агентлиги раиси Корея Республикасининг давлат хизматида инсон ресурсларини бошқаришда сунъий интеллект технологияларидан фойдаланиш ва автоматлаштириш тажрибаси, шунингдек, давлат хизматлари сифатини баҳолаш тажрибаси билан қизиқди.

Учрашув якунида томонлар давлат хизмати соҳасида тажриба ва билим алмашиш бўйича ҳамкорликни янада ривожлантиришга тайёр эканликларини билдирдилар.