Дарбаза-Мақтаарал темир йўл линияси қачон қурилади

ҚР Транспорт вазири Марат Қарабаев
Фото: Виктор Федюнин / Kazinform

Хитойга темир йўлнинг юк ташиш қувватини йилига 76 миллион тоннага етказиш режалаштирилган. Бу ҳақда ҚР Транспорт вазири Марат Қарабаев маълум қилди, дея хабар беради Kazinform мухбири.

“Бугунги кунда беш қўшни давлат билан 27 темир йўл чегара пункти орқали алоқа ўрнатилди. Унинг аксарияти ўз имкониятларидан тўлиқ фойдаланиб келмоқда. Йил якунларига кўра, Хитой ва Марказий Осиё йўналишларидаги “Достық”, “Алтынкөл” ва “Сариағаш” станцияларининг техник имкониятлари тўлиқ юкланади”, - деди М. Қарабаев Ҳукуматнинг бугунги мажлисида.

Унинг таъкидлашича, “Достық” станциясини модернизация қилиш доирасида “Достық – Мойынты” участкасида иккинчи йўл қурилиши кўриб чиқилмоқда.

Бундан ташқари, Хитой томони билан тегишли музокаралар олиб борилиб, Қорғас чегара пунктигача етиб борувчи Цзинхе – Қорғас участкасида иккинчи йўл қуриш бўйича келишувга эришилди.

“Агар юқорида қайд этилган ишлар бажарилса, икки чегара станциясининг юк ташиш қуввати яна 14 миллион тоннага ошиб, йилига 56 миллион тоннани ташкил этади. Шунингдек, учинчи “Бақты – Тачэн” назорат-ўтказиш пунктини очиш ҳам режалаштирилган. Бу лойиҳа чегарадаги темир йўл инфратузилмаси ўтказиш қобилиятини яна 20 миллион тоннага, Хитой йўналишидаги темир йўл ўтказувчанлигини йилига 76 миллион тоннагача ошириш имконини беради”, - деди Транспорт вазири.

Бундан ташқари, Марказий Осиё йўналиши бўйича йилига 10 миллион тоннагача юк ташиш имкониятини берувчи “Дарбаза-Мақтаарал” темир йўл линияси қурилади. Йил охиригача “Дарбаза-Мақтаарал” лойиҳасини қуриш ишлари бошланади.

“Чегара ўтиш жойларидан ташқари магистрал йўналишлар модернизация қилинмоқда. Бугунги кунда автомобиль йўлларининг узунлиги 16 минг километрга етади, шундан атиги 5 минг километри икки томонлама, 4 минг 200 километри эса электр тизими билан жиҳозланган. Магистрал темир йўл линияларининг узлуксиз ташишларини таъминлаш ва ўтказиш қобилиятини ошириш мақсадида жорий йилнинг ўтган даврида 567 километр масофада капитал таъмирлаш ишлари амалга оширилди. Бундан ташқари, 1300 км узунликдаги 4 та темир йўл лойиҳасини қуриш ишлари олиб борилмоқда”, - деди М. Қарабаев.

Ўтган йили “Достық – Мойынты” участкасида иккинчи йўл қурилиши бошланди. Ҳозир қурилиш-монтаж ишлари қизғин давом этмоқда. Ер ётқизиш ишларининг 70 фоизи бажарилди, 316 километр рельс-шпал тармоғи қурилди, 151 километрига асфальт ётқизилди. Лойиҳанинг амалга оширилиши участканинг қувватини 5 баробар ошириш имконини беради.

Ўтган ҳафтада Алмати станцияси айланма йўлида қурилиш-монтаж ишлари бошланди.

“Бақты – Аягөз” лойиҳасини инвестор маблағлари ҳисобидан амалга ошириш режалаштирилган. Бугунги кунда тегишли қарорлар қабул қилиниб, лойиҳа қурилишини бошлаш учун тайёргарлик кўрилмоқда.

Муаллиф: Айжан Серикжанқизи

Сўнгги хабарлар