Чимкентда ҳар бир аҳоли пунктида биттадан поликлиника қуриш ишлари бошланди

SHYMKENT. Кazinform - Клиникада рўйхатга олинган беморлар сони 20 мингдан ошмаслиги керак. Бунинг учун эса ҳар бир аҳоли пунктида поликлиника қуриш лозим. Бу ҳақда Чимкент шаҳар ҳокими Мурат Айтенов халқ билан учрашуви чоғида маълум қилди, деб хабар беради Kazinform otyrar.kzга таяниб.

«Чимкентлик беморлар ўз поликлиникасига 20 дақиқада етиб бориши керак», — деди у. Шаҳар ҳокими шифокорларнинг иш юкламасини камайтириш, тиббий хизмат сифатини ошириш асосий мақсад эканини айтади. Шу боис учинчи мегаполисдаги ҳар бир аҳоли пункти учун биттадан клиника қуриш режалаштирилган.

«Келажак режада поликлиникалар юкламасини 64 мингдан 21 минггача камайтириш назарда тутилган. Ҳар бир поликклиникада 21 мингдан ортиқ одам бўлмаслиги керак. 2022 йилда 28 минг кишини ташкил этди, 2025 йилда эса 21 минг кишига туширишимиз даркор. Бунинг учун ҳар бир аҳоли пунктида поликлиника қуришимиз керак», - деди Мурат Айтенов.

Чимкент шаҳар бош шифокори Нурлибек Асилбековнинг айтишича, ҳар бир аҳоли пункти учун биттадан поликлиника қуриш ишлари жадал олиб борилмоқда.

Шаҳарда жами 51 та поликлиника хизмат кўрсатади. Улардан 14 таси давлат, 37 таси хусусий. Бироқ шаҳар ҳокими хусусий ва давлат шифохоналари томонидан аҳолига тиббий хизмат кўрсатишда фарқ йўқ, дейди. Шу боис, келгусида хусусий шериклик асосида бунёд этиладиган тиббиёт муассасалари сонини кўпайтириш кўзда тутилган.

Фото: kz.otyrar.kz