C5+1 махсус сессиясида Афғонистон билан боғлиқ кенг кўламли масалалар муҳокама қилинди

ASTANА. Каzinform – АҚШнинг Афғонистон бўйича махсус вакили Томас Уэст Афғонистон бўйича C5+1 махсус сессиясида иштирок этиш учун Астанага келди, дея хабар беради Қозоғистон Республикаси Ташқи ишлар вазирлиги матбуот хизмати.

ҚР Ташқи ишлар вазирлигида бўлиб ўтган сессияда Қозоғистон, Қирғизистон, Тожикистон, Туркманистон, Ўзбекистон ва АҚШ вакиллари гуманитар ёрдам кўрсатиш, инсон ҳуқуқларини ҳимоя қилиш, Афғонистон билан халқаро ҳамкорлик, шунингдек, хавфсизлик ва терроризмга қарши кураш масалалари муҳокама қилинди.

Қозоғистон номидан иштирок этган Қозоғистон Республикаси Ташқи ишлар вазирлигининг Махсус вазифалар бўйича элчиси Талғат Қалиев сессия иштирокчилари эътиборини Афғонистондаги вазиятни барқарорлаштириш муаммосига ягона прагматик ёндашув муҳимлигига қаратди.

ҚР Ташқи ишлар вазирининг биринчи ўринбосари Қайрат Омаров АҚШ махсус вакилини қабул қилди. Учрашувда Америка томони Қозоғистон Ҳукумати томонидан афғон халқига ёрдам кўрсатиш бўйича кўрилаётган чора-тадбирларни олқишлади ва ижтимоий-иқтисодий вазиятни барқарорлаштириш бўйича чора-тадбирларни қайд этди.

Қ.Омаров Қозоғистон Афғонистонга ёрдам кўрсатиш бўйича халқаро саъй-ҳаракатларни бирлаштириш ва мамлакатдаги жиддий гуманитар инқироздан чиқиш йўлларини топиш тарафдори эканини таъкидлади. Хусусан, ҚР Президенти Қасим-Жомарт Тоқаевнинг Алмати шаҳрида Марказий Осиё мамлакатлари ва Афғонистоннинг ижтимоий-иқтисодий ва савдо-инвестицияларни ривожлантириш соҳаларидаги ҳамкорлигини ривожлантиришга қаратилган БМТнинг Барқарор ривожланиш минтақавий марказини ташкил этиш ташаббусига эътибор қаратилди.

Эслатиб ўтамиз, C5+1 минтақадаги бешта давлатнинг (Қозоғистон, Қирғизистон, Тожикистон, Туркманистон ва Ўзбекистон) АҚШ билан савдо-иқтисодий ва ўзаро манфаатли бошқа соҳаларда ўзаро ҳамкорлиги учун минтақавий дипломатик платформа ҳисобланади.