Буюк Британияда шифокорлар мамлакат тарихидаги энг узоқ давом этган норозилик намойишини уюштиришди

Британияда кичик тоифадаги шифокорлар мамлакат тарихидаги энг узоқ давом этган норозилик намойишини уюштиришди. Бир неча кундан бери улар беморларни даволаш ўрнига кўчага чиқиб, маошларини оширишни талаб қилмоқда, деб хабар беради Каzinform мухбири.

Биринчидан, кичик тоифадаги шифокорлар уч кун давомида ўз касбий бурчларини бажариш ўрнига қўлларига баннерлар кўтариб норозилик билдиришди. Оқ халатлилар иш ҳақини 35 фоизга ошириш ва меҳнат шароитларини яхшилашни талаб қилмоқда.

“Штатда шифокорлар сони чекланган. Ҳамширалар жуда кам. Биз чарчадик. Ҳеч қандай ёрдам олмаймиз, маҳоратимизни оширмаяпмиз”, - дейди кичик шифокор Лиззи Гринфилд.

Миллий соғлиқни сақлаш хизматининг ярми кичик шифокорлардир. Яъни, 10 йилгача иш тажрибасига эга бўлган ёш мутахассислар ва тиббиёт университетини яқинда битирганлар. Умумий сони 70 мингга яқин. Уларнинг учдан икки қисми касаба уюшмалари аъзоларидир. Британия тиббиёт ассоциацияси ҳукумат билан келишувга эриша олмаяпти.

“Кичик тоифадаги шифокорлар ва касаба уюшмаси музокаралар столига қайтишларини истардим. Касалхоналар иши жонланса яхши бўларди”, - деди Британия соғлиқни сақлаш вазири Виктория Аткинс.

Шунга ўхшаш иш ташлашлар Англия бўйлаб уюштирилди. Янги йилдан кейин намойишчилар яна 6 кун ишга чиқмасликларини айтишмоқда. Бу Миллий соғлиқни сақлаш хизмати тарихидаги энг узун иш ташлашдир. Натижада 1 миллиондан ортиқ киши тиббий ёрдамдан маҳрум.