Бундестаг Шольц ҳукуматига ишончсизлик вотумини қабул қилди
ASTANА. Кazinform – Бундестаг депутатларининг аксарияти Олаф Шольц ҳукуматига ишончсизлик вотумини қўллаб-қувватлади, деб хабар беради BBC.
Германия канцлерининг ўзи коалиция парчаланганидан кейин парламент олдида бу масалани кўтарган. Германияда муддатидан олдин сайловлар 23 февралга белгиланган.
Энди президент Франк-Вальтер Штайнмайер 21 кун ичида Бундестагни тарқатиб юбориш тўғрисида қарор қабул қилиши керак. У аввалроқ “мамлакатга барқарор жамоа ва ҳаракат қила оладиган ҳукумат керак”, деб айтган эди, шунинг учун Штайнмайер Бундестагни тарқатиб юбориши ҳақида тахминлар бор.
Кейин 60 кун ичида Германияда янги сайловлар ўтказилади.
Сўровларга кўра, Фридрих Мерц бошчилигидаги Христиан партияларининг ХДИ/ХСИ коалициясининг навбатдан ташқари сайловда ғалаба қозониш имконияти юқори: уни сайловчиларнинг 30 фоиздан сал кўпроғи қўллаб-қувватламоқда. Мерц, хусусан, ҳарбий харажатларни оширишга ва ноқонуний муҳожирлар учун чегарани ёпишга ваъда беради. Шунингдек, у Украинага Taurus ракеталарини етказиб бериш имкониятини ҳам инкор этмайди - бунга Шольц ва унинг партияси қарши.
Иккинчи ўринда, сўров натижаларига кўра, "Германия учун альтернатив" ўнг қанот популист партияси бўлиши мумкин. Сайловчиларнинг 20 фоизга яқини унга овоз беришга тайёр. Бироқ бошқа партиялар анъанага кўра “Альтернатив” билан ишлашдан бош тортади, шу боис партиянинг янги коалицияга қўшилиши даргумон.
Сўров натижаларига кўра, Социал-демократик партия 17 фоизга яқин, “Яшиллар” эса 11 фоиз овоз олиши мумкин.
Германия Конституцияси Бундестагни ўз-ўзидан тарқатиб юборишга рухсат бермайди. Шу боис, муддатидан олдин сайлов ўтказишнинг ягона йўли ҳукуматга ишончсизлик вотумини ўтказишдир.
Аввал хабар қилинганидек, ишлаётган ва немис жамиятига интеграциялашган Сурия фуқаролари мамлакатда қолишда давом этишлари мумкин бўлади. Бу ҳақда канцлер Олаф Шольц шу ҳафта халққа қилган мурожаатида айтди.
