Бундан буён Қозоғистонга келган хорижликлар туристик солиқ тўламайди
2022 йилда хорижликлар учун мамлакат ҳудудида жорий қилинган туристик солиқ бекор қилинади. Бу маълумотни ҚР Туризм ва спорт вазирлиги тасдиқлади, деб хабар беради Kazinform.
“Қозоғистон Республикаси Туризм ва спорт вазирининг 2023 йил 27 декабрдаги 347-сон буйруғи билан чет элликлар учун туристик йиғимлар тўлаш қоидаларига ўзгартиришлар киритилди. Унга кўра, Қозоғистоннинг бутун ҳудудида нол ставка қўлланилади. Мазкур буйруқ Адлия вазирлигида ўтган йилнинг 28 декабрида рўйхатга олинган ва расмий эълон қилинган кундан бошлаб 10 календарь кун ўтиб кучга киради”, – дейилади вазирлик хабарида.
Шу боис, 7 январдан бошлаб хорижлик сайёҳлар йиғим тўлашдан озод қилинади.
Эслатиб ўтамиз, 2022 йилдан жорий этилган туристик солиқ туристлардан шаҳар ва туманлардаги ётоқхоналар, меҳмонхоналар, ижара уйлари бундан мустасно, туристик турар жойлардаги ҳар бир кун учун ундириладиган йиғим ҳисобланади.
Туристик операторлар чет элликлар учун олинган маблағларни маҳаллий бюджетга ўтказдилар.
Бадал миқдорини 1 фоиздан 3 фоизгача этиб ҳокимликлар томонидан белгиланган эди.
