Бугун Қозоғистоннинг айрим ҳудудларида соат миллари 60 дақиқага орқага сурилди
ASTANA. Kazinform — Қозоғистонда ягона вақт зонаси (UTC+5) ўрнатилди. Астана шаҳридаги ЭКСПО майдонидаги «Нұр Әлем» сферасида соат миллари 60 дақиққага орқага сурилди.
Ҳукуматнинг “Қозоғистон Республикаси ҳудудида вақтни ҳисоблаш тартиби тўғрисида”ги қарорига киритилган ўзгартиришларга мувофиқ, 29 февралдан бошлаб Астана, Алмати, Чимкент шаҳарлари ва Ақмола, Алмати, Жамбил, Қарағанди, Қостанай, Павлодар, Шимолий Қозоғистон, Туркистон, Шарқий Қозоғистон, Абай, Жетису, Улитау вилоятлари 1-мартга ўтар кечаси (соат 00:00 да) маҳаллий вақт 1 соат орқага сурилди.
Бугунги қадар Қозоғистонда иккита вақт зонаси мавжуд эди: UTC+5 ва UTC+6. Мамлакат ҳудудининг катта қисми (ғарбий вилоятлардан ташқари) UTC+6 зонасида жойлашган.
Қозоғистонда ягона вақт минтақасини жорий этиш вақтни ҳисоблаш бўйича ишчи гуруҳ таркибига кирган қозоғистонлик олимлар ва экспертлар томонидан таклиф қилинган.
Ишчи гуруҳ 2023 йил апрель ойида қозоғистонликларнинг энг қулай вақт зонасига кўчиб ўтиш бўйича такрорий мурожаатлари туфайли тузилган эди.
Унинг таркибига илмий институтлар, тиббиёт университетлари, марказий ва маҳаллий давлат ҳокимияти органлари вакиллари, парламент депутатлари ва бошқалар кирган.
Бир йилда тиббиёт, физиология, география, метрология ва ҳ.к. соҳаларни ўз ичига олган ишчи гуруҳ аъзолари Қозоғистонда мос вақт минтақасини белгилаш масаласини ўрганиб чиқди.
Ишчи гуруҳ UTC+5 бирлашган вақт зонасига ўтишни энг тўғри ва оптимал йўл деб топди. Шу билан бирга, Қозоғистоннинг кўплаб ҳудудлари табиий вақтга энг яқин вақтдан фойдаланади.
