Бу йил Қозоғистондаги 3 та нефтни қайта ишлаш заводи таъмирланади

ASTANA. Кazinform – ҚР Энергетика вазири Болат Ақшолақов вазирликнинг кенгайтирилган ҳайъат йиғилишида мамлакатдаги барча учта нефтни қайта ишлаш заводи жорий йилда таъмирланишини маълум қилди, деб хабар беради Кazinform мухбири.

«2022 йилда рекорд миқдорда АИ-92 бензин ва дизель ёқилғиси ишлаб чиқардик. Бундай кўрсаткичга эришишга Чимкент нефтни қайта ишлаш заводини капитал таъмирлаш 2023 йилга кўчирилгани сабаб бўлди. Жорий йилда барча 3 та нефтни қайта ишлаш заводида режали таъмирлаш ишлари олиб борилиши ҳисобга олинса, ишлаб чиқариш ҳажми 13,4 миллион тоннани ташкил этиши кутилмоқда», — деди вазир.

Болат Ақшолақов, шунингдек, Чимкент нефтни қайта ишлаш заводини кенгайтириш бўйича техник-иқтисодий асосларни лойиҳалаш бошланишини маълум қилди.

«Жорий йилда вазирликнинг асосий вазифаси ички бозорни сифатли нефть маҳсулотлари билан тўлиқ таъминлашдан иборат. Иқтисодиётнинг сифатли ёқилғи-мойлаш материалларига бўлган талабини қондириш мақсадида жорий йилда ишлаб чиқариш ҳажмини йилига 6 миллион тоннадан 9 миллион тоннага, келгусида эса йилига 12 миллион тоннага етказиш ниятидамиз», — деди вазир.

Фото: brookings.edu

Муаллиф: Есимжан Нақтибай