Бу йил Қозоғистонда умумий қиймати 1,5 триллион тенге бўлган 180 та лойиҳа амалга оширилади
ASTANА. Кazinform - Қозоғистон Республикаси Бош вазири Алихан Смаилов раислигида Маҳаллий тадбиркорлар кенгашининг йиғилишида импорт ўрнини босишни ривожлантириш ва Қозоғистон товарлари ва хизматларининг экспорт салоҳиятини ошириш масаласи муҳокама қилинди.
Кўрилган чора-тадбирлар туфайли кейинги йилларда ишлаб чиқариш саноатининг экспорт ҳажми ошди.
Шу билан бирга, Қозоғистон импорт қилинадиган товарларнинг катта қисмини маҳаллий ишлаб чиқариш учун етарли салоҳиятга эга.
“Бу ишга имкон қадар мамлакат ичидан кадрлар, хомашё ва товарларни сафарбар этиш муҳим. Ҳукумат рақобатбардош корхоналарни ривожлантириш учун қулай шарт-шароитлар яратишда давом этади», – деди Алихан Смаилов.
ҚР Саноат ва қурилиш вазири Қанат Шарлапаевнинг маърузасида айтилишича, ўтган йилнинг 11 ойи якунлари бўйича ишлаб чиқариш саноатининг ташқи савдо айланмаси 12 фоизга ўсиб, 74,2 миллиард долларни ташкил этди.
2023 йилда йирик буюртмачилар ва маҳаллий ишлаб чиқарувчилар ўртасида умумий қиймати 66 миллиард тенге бўлган 179 та узоқ муддатли ва оффтейк шартномалар тузилди.
Импорт ўрнини босишни рағбатлантириш мақсадида маҳаллий қайта ишлаш корхоналарини арзон нархларда хомашё билан таъминлаш механизми ишга туширилди.
Шу билан бирга, ишлаб чиқариш саноатида импорт ўрнини босиш ва экспортга йўналтирилган инвестиция лойиҳаларини амалга ошириш бўйича ишлар олиб борилмоқда.
Жорий йилда умумий қиймати 1,5 триллион тенге бўлган 180 та лойиҳани амалга ошириш режалаштирилган.
Бунинг натижасида 18 мингдан ортиқ иш ўрни яратилади.
Йиғилиш якунида Бош вазир импорт ўрнини босувчи маҳсулотларни ишлаб чиқариш иқтисодиёт барқарорлигини таъминловчи муҳим омил эканини таъкидлади.
