Бу йил Қозоғистонда сунъий интеллект университети талабаларни ўқитишни бошлайди
ASTANA. Kazinform – Сунъий интеллект соҳасидаги янги университет 600 нафар талабани қабул қилади. Бу ҳақда Ҳукумат йиғилишида ҚР Фан ва олий таълим вазири Саясат Нурбек маълум қилди.
“Биз олий таълим муассасалари ва корхоналар ўртасидаги ҳамкорликни кучайтирмоқдамиз. Бу йўналишдаги ишларни «Самруқ-Қазна» жамғармаси билан амалга оширилаётган қўшма чора-тадбирлар мисолида кўрсатиб ўтай. Жамғарманинг портфель компанияларида ҳар йили қарийб 10 минг нафар талаба дуал таълим ва ишлаб чиқариш амалиётидан ўтади. 2026 йилнинг биринчи ярмида ушбу форматда 4300 нафардан ортиқ талаба қамраб олинди. Дуал таълим кончилик, энергетика, IT, электротехника, темир йўл транспорти, телекоммуникациялар, рақамли технологиялар, ресурсларни қазиб олиш ва қайта ишлаш йўналишларини қамраб олади. Ўқув дастурларини иш берувчилар талабларига мослаштириш мақсадида ўқитувчиларнинг ишлаб чиқариш амалиётидан ўтиши ташкил этилмоқда”, — деди С. Нурбек.
Унинг айтишича, ўтган ўқув йилида 100 нафардан ортиқ ўқитувчи ишлаб чиқариш амалиётидан ўтган. Келгуси ўқув йилида яна 100 нафар ўқитувчини корхоналар базасида амалиётдан ўтказиш режалаштирилган.
“Бу йил Давлат раҳбари топшириғига мувофиқ, Қозоғистон тадқиқот сунъий интеллект университети талабаларни ўқитишни бошлайди. Тахминан 600 нафар талаба қабул қилинади. Бакалавриатга 400 нафар талаба қабул қилинади, уларнинг 308 нафари давлат гранти соҳиблари бўлади. Магистратура дастурига 100 нафар киши Astana Hub ва Alageum грантлари, шунингдек, тўлов-контракт асосида қабул қилинади. «Самруқ-Қазна» ўзининг 100 нафар ходимини MBA AI+X дастури бўйича ўқитади”, — деди вазир.
Эслатиб ўтамиз, аввалроқ янги ўқув йилида талабаларга қанча қўшимча грант ажратилиши ҳақида хабар берган эдик.
