БМТни кучайтириш керак, унинг ўрнини босадиган ташкилот йўқ - ҚР Президенти
ASTANА. Кazinform - Давлат раҳбари Astana Think Tank форумининг ялпи мажлисида иштирок этмоқда, деб хабар берди Ақорда матбуот хизмати.
Форум якунида Давлат раҳбари форум иштирокчиларини қизиқтирган саволларга жавоб берди.
Ялпи мажлис модератори, Berlin Global Dialogue раиси Ларс-Хендрик Рёллер Президентга Қозоғистоннинг минтақадаги ўрни, шунингдек, минтақавий ҳамкорлик орқали ўрта державалар позицияларидан самаралироқ фойдаланиш борасида қандай муаммолар борлиги ҳақида сўради.
— Аввало, биз минтақавий сиёсат ва Марказий Осиёдаги барча қўшниларимиз билан яқин ҳамкорликка содиқ эканимизни қайд этмоқчиман. Ҳамкорликни чуқурлаштирсак, бу Қозоғистон ва Марказий Осиёнинг бошқа мамлакатлари манфаатлари учун фойдали бўлади. Ҳозирги ҳолатни ўн йил олдинги ҳолат билан солиштириб бўлмайди, бутунлай бошқача. Бугун биз фаол ҳамкорликни ривожлантирмоқдамиз, кенг кўламли масалалар бўйича виртуал алоқа ўрнатилди. Марказий Осиё давлатлари раҳбарлари тез-тез учрашиб туради. Умумий муаммоларни биргаликда ҳал қилади. Бу учрашувларнинг натижалари жуда кўп. Шундай қилиб, менинг жавобим аниқ. Сиёсий позицияларимиз стратегик мувозанатни мустаҳкамлашга қаратилган. Назаримда, Марказий Осиёнинг жаҳон харитасидаги ўрни ўзига хосдир. Ўйлайманки, минтақадаги ҳамкасбларим ҳам бунга қўшилади. Биз ушбу ўта муҳим минтақанинг салоҳиятини мустаҳкамлаш учун барча имкониятларни ишга соламиз.
Бирлашган Миллатлар Ташкилотига келсак, мен уни кучайтириш керак, деб ҳисоблайман. Чунки унинг ўрнини босадиган ташкилот йўқ. БМТнинг камчиликлари кўп бўлса-да, бизда бошқа муқобил йўқ. Шу боис Қозоғистон БМТ ролини кучайтириш бўйича ўхшаш позицияга эга бўлган барча давлатлар билан ҳамкорлик қилиш ниятида. Минтақавий ва ўрта державаларнинг овози биринчи навбатда Хавфсизлик Кенгашида эшитилиши керак. Хавфсизлик Кенгаши ҳам ислоҳотга муҳтож. Чунки у, афсуски, боши берк кўчададир. Ва барчамиз биргаликда ундан чиқиш йўлини топишимиз керак. Биз келгуси йили ўзининг 80 йиллигини нишонлайдиган Бирлашган Миллатлар Ташкилотини қўллаб-қувватлашимиз керак, – деди Қасим-Жомарт Тоқаев.
