БМТ Хавфсизлик кенгаши Украинадаги вазиятни муҳокама қилади
АҚШнинг Бирлашган Миллатлар Ташкилоти қошидаги доимий вакили Линда Томас-Гринфилд Россиянинг Украина билан чегара яқинига ҳарбий кучларни тўплашининг сабаблари ҳақида аниқ жавоб олишни хоҳлашини айтди.
Ғарб давлатлари қўлдан келганича Украинага ёрдам бермоқда.
Россия ташқи ишлар вазирлиги Қўшма Штатлар ва НАТОни ҳарбий ва сиёсий мақсадларда Россия чегараларида кескинликни қўзғатиш учун Украинадан фойдаланаётганликда айблади.
«Дунёнинг ҳар қандай давлати каби биз ҳам АҚШ билан яхши, ҳатто ўзаро ҳурмат ва тенглик асосида ҳамкорлик қилишни истаймиз. Бу ҳақда Россия президенти Владимир Путин АҚШ президенти Жо Байденга маълум қилди. У ҳатто 2021 йил июн ойида Женевада бўлиб ўтган учрашувда ҳам шундай баёнот берган эди», — деди Россия ташқи ишлар вазири Сергей Лавров.
Россия АҚШ ва НАТОдан ҳарбий иттифоқини шарққа томон кенгайтирмаслигига кафолат беришни талаб қилди. Аммо АҚШ ва НАТО бу талабни муҳокама қилишдан бош тортган.
