Биз ХХР билан муносабатларни юксак қадрлаймиз – ҚР Президенти
ASTANA. Kazinform – ҚР Президенти Хитой Коммунистик партияси Марказий қўмитаси халқаро алоқалар бўлими мудири Лю Цзяньчаони қабул қилди. Бу ҳақда Ақорда матбуот хизмати хабар берди.
Учрашувда Қасим-Жомарт Тоқаев Қозоғистон-Хитой абадий ва ҳар томонлама стратегик шериклик муносабатлари жадал ривожланиб бораётгани ва келажакда ҳам бу йўналишдан оғишмаслигини таъкидлади.
“Бугунги кунда мустаҳкам алоқаларимиз азалий дўстлик, яхши қўшничилик ва стратегик шерикликка асосланган ўзаро манфаатли давлатлараро ҳамкорлик намунаси сифатида қаралмоқда. Биз ХХР билан муносабатларни қадрлаймиз. Шунингдек, Қозоғистон ҳар томонлама ҳамкорликни мустаҳкамлаш учун барча зарур чораларни кўради. Шу билан бирга, мен Хитой Коммунистик партияси Марказий Қўмитаси Бош котиби, Хитой Халқ Республикаси Раиси жаноб Си Цзиньпин билан дўстлигимизни юксак қадрлайман”, – деди Давлат раҳбари.
Президент ХХР Раисининг июнь ойида бўлиб ўтадиган “Марказий Осиё – Хитой” иккинчи саммитида иштирок этиш учун Астана шаҳрига ташрифи доирасида стратегик шериклик учун янги имкониятлар очилишига ишонч билдирди.
Давлат раҳбари Қозоғистон ва Хитойнинг кўп томонлама тузилмалар доирасида қарашлари ўхшашлигини таъкидлаб, Раис Си Цзиньпиннинг халқаро ҳуқуқнинг асосий тамойиллари ва БМТ Низомига мувофиқ адолатли дунё тартибини шакллантиришга қаратилган глобал ташаббусларини қўллаб-қувватлашини таъкидлади.
Бундан ташқари, Қасим-Жомарт Тоқаев мамлакат “ягона Хитой” сиёсатига содиқ эканини тасдиқлади.
Ўз навбатида, Лю Цзяньчао Давлат раҳбарига раис Си Цзиньпиннинг самимий тилакларини етказди. Унинг сўзларига кўра, Хитой Қозоғистонни стратегик муҳим ҳамкор деб билади ва Қозоғистон-Хитой ҳамкорлигини чуқурлаштиришга катта аҳамият беради.
Учрашувда савдо-иқтисодий, сармоявий ва маданий-гуманитар соҳалардаги ҳамкорликни мустаҳкамлаш йўллари муҳокама қилинди. Шу муносабат билан Қасим-Жомарт Тоқаев икки мамлакат ўртасидаги товар айирбошлаш ҳажмини ошириш, транспорт-логистика, энергетика ва сунъий интеллектни ривожлантириш соҳаларида йирик сармоявий лойиҳаларни амалга ошириш учун улкан имкониятлар мавжудлигини таъкидлади.
Эслатиб ўтамиз, бунгача Словения Президенти Наташа Пирц-Мусар расмий ташриф билан Қозоғистонга келиши ҳақида ёзган эдик.
