Беш йил ичида Қозоғистон қишлоқ хўжалиги маҳсулотлари экспортини қарийб икки баравар оширди
ASTANA. Kazinform - Сўнгги беш йил ичида Қозоғистон агросаноат мажмуаси маҳсулотлари экспорти қарийб икки бараварга — 3,8 миллиард доллардан 7 миллиард долларгача ошди. Бу ҳақда хорижий The World Financial Review журналида чоп этилган мақолада айтилади, деб хабар беради Kazinform агентлиги мухбири.
Муаллифларнинг таъкидлашича, бугунги кунда Қозоғистоннинг минтақа озиқ-овқат хавфсизлигини таъминлашдаги роли тобора ортиб бормоқда. Бу, айниқса, дон бозори мисолида яққол намоён бўлмоқда.
Сўнгги 11 ой давомида мамлакат 13,5 миллион тонна дон ва ун экспорт қилди. Бу ўтган мавсумнинг шу даврига нисбатан 12,5 фоизга кўп. Бунда асосий ўсиш қўшни бозорларга экспорт ҳисобига тўғри келди.
Афғонистонга экспорт 59 фоизга ошиб, 2,2 миллион тоннага етди, Қирғизистонга 504 минг тоннани ташкил этиб, қарийб 40 фоизга кўпайди. Туркманистонга 210 минг тонна маҳсулот экспорт қилинди, бу йиллик ҳисобда 34 фоизга кўп. Ўзбекистонга экспорт эса 37 фоизга ошиб, 5,6 миллион тоннага етди. Умуман олганда, Қозоғистон фермерлари қишлоқ хўжалиги маҳсулотларини 72 дан ортиқ мамлакатга етказиб бермоқда.
Экспортнинг асосий йўналишлари нафақат Марказий Осиё ва Афғонистонни, балки Европа Иттифоқи мамлакатлари, Евроосиё иқтисодий иттифоқи давлатлари, Туркия ва Хитойни ҳам қамраб олади. Бундан ташқари, расмий маълумотларга кўра, сўнгги беш йилда агросаноат мажмуаси маҳсулотлари экспорти қарийб икки баравар — 3,8 миллиард доллардан 7 миллиард долларгача ошган, дейилади мақолада.
Иқтисодий ҳамкорлик ва тараққиёт ташкилоти (OECD) ҳамда Озиқ-овқат ва қишлоқ хўжалиги ташкилоти (FAO) маҳсулот ортиқча бўлган ҳудудлардан озиқ-овқат танқислиги кузатилаётган ҳудудларга маҳсулот етказиб бериш бозорларни барқарорлаштириш ва маҳаллий таъминотда узилишлар хавфини камайтиришга хизмат қилиши мумкинлигини таъкидлайди.
