Бельгия билан муносабатларимизнинг улкан салоҳиятига ишонаман — Президент
ASTANA. Kazinform — Президент Қасим-Жомарт Тоқаев Қозоғистон Бельгияни Европада вақт синовидан ўтган ишончли ҳамкор сифатида кўришини таъкидлади.
“Келгуси йили мамлакатларимиз ўртасида дипломатик муносабатлар ўрнатилганига 35 йил тўлади. Ташрифингиз ушбу муҳим санага тайёргарлик ишларига янги суръат бағишлайди ва ҳамкорлигимизни аниқ натижалар билан бойитади. Бельгия Қозоғистоннинг етакчи савдо ҳамкорлари қаторига киради. Шунингдек, мамлакатингиз Қозоғистон иқтисодиётига энг кўп сармоя киритган ўнта давлатдан бири ҳисобланади. Буни Қозоғистон иқтисодиётининг истиқболига бўлган ишончнинг яққол ифодаси деб биламан”, — деди Президент.
Давлат раҳбари Қозоғистон ва Бельгия ўртасида транспорт-логистика, муҳим минераллар, қайта тикланувчи энергия манбалари, қишлоқ хўжалиги, соғлиқни сақлаш ва сунъий интеллект соҳаларида ўзаро ҳамкорликни кенгайтириш учун катта имкониятлар мавжудлигига эътибор қаратди.
“Сиз билан бирга келган давлат органлари, минтақавий ҳокимият вакиллари, бизнес гуруҳлари вакилларига, таниқли олимлар ҳамда журналистларга алоҳида миннатдорлик билдираман. Эртага Қозоғистон — Бельгия Ишбилармонлик кенгашининг тўртинчи йиғилишини ўтказамиз. Ушбу ташаббус имкониятларимизни рўёбга чиқариш ва барқарор натижаларга эришиш учун самарали майдонга айлангани қувонарлидир. Шунингдек, Бельгия билан Европа Иттифоқи ва бошқа кўп томонлама тузилмалар доирасидаги ҳамкорлигимизни юксак қадрлаймиз. Дунёда беқарорлик кучайиб бораётган бир пайтда ишонч, ҳурмат ва ўзаро англашув тамойилларига асосланган ишбилармонлик алоқаларининг аҳамияти ортиб бормоқда. Муносабатларимизнинг улкан салоҳиятига ишонаман. Ташриф доирасида эришилган келишувларни тўлиқ амалга ошириш учун бор куч-ғайратимни сафарбар этаман”, — деди Қасим-Жомарт Тоқаев.
Эслатиб ўтамиз, 11-14 октябрь кунлари Бельгияликлар Қироли Филипп ва Қиролича Матильданинг Қозоғистонга давлат ташрифи бўлиб ўтади. Ташриф дастури тўртта асосий йўналишни қамраб олади. Булар — муҳим фойдали қазилмалар, сунъий интеллект, соғлиқни сақлаш, шунингдек, тарих ва маданият.
Бугун Қасим-Жомарт Тоқаев Бельгияликлар Қироли Филипп ва Қиролича Матильдани Ақордада кутиб олди.
