БААда тўхтовсиз ёғингарчилик туфайли ҳаво рейслари бекор қилинди
ASTANА. Кazinform - Бирлашган Араб Амирликларида кучли ёмғир ёғиб, айрим аҳоли пунктларида кучли сув тошқинларига сабаб бўлди. Мамлакатнинг энг йирик шаҳри Дубай табиий офатдан жабр кўрган ҳудудлар қаторига киради. 15 апрель куни кечқурун бошланган ёмғир тўхтамади, деб хабар беради АZERTAG.
Khaleej Times нашрининг ёзишича, ёмон об-ҳаво туфайли Дубай халқаро аэропортида камида 17 та рейс бекор қилинган. Парвозларни бекор қилиш, кечикишлар ва йўналишни ўзгартириш кун давомида қайд этилаётир.
Бир қатор шаҳарларда жамоат жойларига боришга чекловлар жорий этилди, айрим йўналишларда денгиз транспорти ва автобуслар ҳаракати тўхтатилди.
Фавқулодда вазият туфайли БАА футбол ассоциацияси 16 апрелга белгиланган барча ўйинларни кейинга қолдиришга қарор қилди.
Ал-Айн шаҳрининг Ал-Қуа туманида кўчки туфайли йўл ўпирилди ва катта тешик пайдо бўлди.
Бирлашган Араб Амирликлари расмийлари одамларга чоршанба кунига қадар давом этиши кутилаётган бўрон тинчланмагунча, зарурат бўлмаса, уйларини тарк этмасликни тавсия қилди.
