Австралия чет эллик талабалар сонини қисқартиради
ASTANА. Кazinform - Австралия ҳукумати ижара нархларининг кескин ошишига сабаб бўлган рекорд даражадаги миграцияни чеклаш мақсадида 2025 йилда янги хорижлик талабалар сонини 270 минг нафаргача чеклашини маълум қилди, деб хабар беради Аzertag.
Қарор ўтган йили халқаро талабалар ва COVID пандемияси даврида ишлаётган ишчилар учун имтиёзларни тўхтатишга қаратилган бир қатор чора-тадбирлардан сўнг қабул қилинди. Қаттиқ чегара назорати чет эллик ишчиларнинг мамлакатга киришига тўсқинлик қилганда, бу имтиёзлар компанияларга маҳаллий ишчиларни ёллашга ёрдам берди.
“Бугунги кунда университетларимизда пандемиядан олдингига нисбатан 10 фоизга, хусусий касб-ҳунар таълими муассасаларида эса 50 фоизга кўп хорижий талабалар таълим олмоқда”, - деди матбуот анжуманида мамлакат таълим вазири Жейсон Клэр.
Университетлар учун янги чет эллик талабалар сони 145 минг билан чекланади, бу тахминан 2023 йилдаги миқдорга тенг. Амалий ва касбий курсларда таҳсил олаётган хорижлик талабалар сони эса 95 минг нафарга камаяди.
Австралия университети президенти профессор Дэвид Ллойднинг айтишича, ҳукумат муҳожирлар сонини назорат қилиш ҳуқуқига эга, аммо таълим каби муҳим тармоқлар ҳисобига эмас. Австралиянинг темир рудаси, газ ва кўмирдан кейин тўртинчи йирик экспорти бўлган халқаро таълим 2022-23 молиявий йилида мамлакат иқтисодиётига 24,7 миллиард доллар ҳисса қўшди.
Аммо сўровлар шуни кўрсатадики, сайловчилар чет эллик талабалар ва ишчиларнинг катта оқими уй-жой бозорига ортиқча босим ўтказишидан хавотирда. Бу ҳолат иммиграцияни кейинги федерал сайловларда бир йилдан камроқ вақт ичида потенциал асосий кураш майдонига айлантиради.
2023 йил 30 сентябрга қадар Ҳиндистон, Хитой ва Филиппин талабалари ҳисобига соф иммиграция 60 фоизга ўсиб, рекорд даражадаги 548 800 нафар кишига етди.
Ўсиб бораётган миграция суръатларини жиловлаш учун ҳукумат ўтган ой чет эллик талабалар учун виза тўловларини икки баравар оширди ва уларга қолиш муддатини узайтириш имконини берувчи бўшлиқларни ёпишга ваъда берди.
